Ală ngai do, 5 nă cau tàm Jơnum lơh broă sồ 1- Mpồl Atbồ drà kă bro sồ 4, Ci kụk Atbồ Drà kă bro càr Dăk Lăk sùm pal tơnguh dơ̆ lơh broă, lơh broă bơdìh jiơ lơh broă sră pơ àr gơnoar atbồ. Bi Nguyễn Thị Minh Hạnh, cau sok sền Jơnum lơh broă pà gĭt, ală cau tàm mpồl gam tơrgùm lòt sền, sŏk sền broă lơh lơh sa kă bro bơh rlau 1 rơbô 800 anih tàm ù tiah tiah drà Buôn Ma Thuột: “Jơnum lơh broă tus tơn tàm ală hìu bơnhă lơh sa kă bro, là mpồl cau, cau dồ nă să, nàng mblàng yal, tơngkah broă lơh jat di ală jơnau cih bơh adat boh lam dê tàm broă lơh lơh sa kă bro. Tàm hơ̆, sồr ală hìu bơnhă tŭ blơi phan phan gàr niam bơta bơkah niam, tiah lơh gơlik loh làng, lĭp mat mờ tăc di giă, ờ gŏ di lời gơlik geh bơta tơnguh giă ờ di pal, prap phan bơna kơ̆p gơguh giă; mơkung rcang lài tac phan bơna, gàr niam tăc mờ blơi tơl làm ai drà kă bro in tàm tơngai sa tềp bơhiàn dà lơgar”.

 Mò Võ Thị Bạch Nga, cau tờm dùl anih ràng tăc phan bơna tàm sơnah ƀòn Tân Lập, càr Dăk Lăk pà gĭt, pah dơ̆ lài mờ tơngai sa tềp bơhiàn dà lơgar pah nam, anih lơh broă geh gơnoar den tus mblàng yal, hòi jà, sồr hìu bơnhă kĭ jơnau hơ lơh jat broă kă bro yal loh làng, song dơ pă, di mờ jơnau sồr:“Bồ nhai 1/2026, Ci kụk Atbồ drà kă bro neh dong kờl, bơto pơlam, sồr hìu bơnhă kĭ hơ lơh jat dơ̆ 1 là: blơi phan gĭt tiah tờm lơh gơlik loh làng bơh tàm tŭ blơi, gàr tơl bơta bơkah niam, tơngai ai ngui phan bơna; dilah cau lơi tơnguh giă den pal lơh jat di mờ jơnau sồr bơnah rơhiang geh lĭp dê. Sùm geh lài phan bơna nàng drơng broă ai năc in...”

Lơh jat dơ̆ lơh uă rcang lài kơryan phan ờ ngan, phan đòm, phan ờ niam lài mờ tŭ, tàm tŭ mờ tơnơ̆ dơ̆ Sa tềp bơhiàn dà lơgar nam 2026 jat jơnau sồr bơh Mpồl Sồr lơh 389 càr Dăk Lăk dê, bơh tàm nggùl nhai 12 nam 2025 tus tŭ do, Ci kụk Atbồ drà kă bro càr Dăk Lăk neh dồ ròt bal ai cau lòt lơh broă, lòt sền, broă lơh lơh sa kă bro tàm ù tiah gùt càr dê, tơrgùm tàm ală bơta phan ngui sa kwơ màng kờñ pal geh nàng drơng dơ̆ sa tềp in. Bơh lòt sền, mpồl lơh broă neh sền gŏ, lơh glài 242 anih tăc phan lơh tìs, lơh glài rlau 2 tơmàn 300 tơlak đong; kung kŭp, chu pơr gŭc uă bơta phan bơna tìs dê kờp priă rlau 700 tơlak đong.

Ồng Vương Minh Sơn – Kwang lam bồ Ci kụk Atbồ drà kă bro càr Dăk Lăk pà gĭt, bulah bàr pe tiah đah mat tơngai lik càr dê kong gơrềng tài bơh mìu dờng dà tih dà lìu, mơya tiah đah mat tơngai mut càr dê geh kàl phan tam geh tơnhào, lơh bơta pràn blơi phan tàm tơngai sa tềp kờp dŭ lài gơguh bơh 25 tus 30%. Ci kụk rơ̆p pơn jat tai đơng lam ală mpồl lơh broă ờs mờng sơlơ tơnguh tai sền gròi, gàr bè ờs tiah lơh sa, kă bro tàm jơh bal drà kă bro ờs mờng bal mờ tàm internet:“Bol añ pơgồp bal mờ mpồl Kảñ sát lơh sa Kwang àng càr, Priă dia càr lam lơh dồ ròt bal broă lòt sền, jat sền tàm dơ̆ lơh uă do dê; mơkung sơlơ ai tai mpồl lơh broă  lơh broă jơh ngai mang, kờp bal mờ ngai dơ̆ 7 mờ ngai rlô, nàng jat sền drà kă bro kung bè dờp ală jơnau yal. Jơnau kờñ là ờ gŏ di lời gơlik geh bơta phan ờ ngan, phan đòm, phan ờ gĭt loh tiah tờm lơh gơlik tăc bro tàm drà kă bro dê, bơh hơ̆ gàr niam ai làng bol in blơi geh ală phan bơna bơkah niam tàm tơngai sa tềp do”.

Kung là mpồl tờm tàm dơ̆ lơh uă rcang lài kơryan kă bro phan ờ ngan, phan đòm, phan ờ niam di dơ̆ do, rlau 1 nhai do, Cơldŭ lơh broă Kảñ sát lơh sa Kwang àng càr Dăk Lăk neh kŭp 274 dơ̆, lơh glài 279 nă cau lơh tìs geh gơrềng tus kă bro phan kơryan ờ ai, phan blăc pơrlồm, phan ờ niam; kă bro sơntìl kòi ờ gĭt tiah lơh gơlik; lơh sa, kă bro sơnơm sền gàr phan tam ờ ngan, jràu tìs mờ kơrnoat boh lam, phăo tìs mờ kơrnoat boh lam... Bè broă pơn jat tai lơh pràn rcang gàr lài ală broă lơh lơh tìs lài mờ tŭ, tàm tŭ mờ tơnơ̆ dơ̆ sa tềp nam Ơseh. 

Trung tá Trịnh Ngọc Hà, Phó Lam bồ Cơldŭ lơh broă Kảñ sát Lơh sa, Kwang àng càr Dăk Lăk yal, mpồl lơh broă neh sền gĭt loh ală kơnòl broă tờm nàng lam lơh:“Mpồl Kảñ sát lơh sa Kwang àng càr Dăk Lăk pơn jat tai rcang lài lơh niam broă lơh sền gĭt bơh gờñ, bơh ngài, bơh tàm ƀòn lơgar, jơh bal tàm ù tiah ngan ngồn mờ tàm internet. Tờm ngan là ală gơl gùng dà lơgar, gùng càr, is ồn là Gùng dà lơgar 1A lòt gan ală càr mut tàm Dăk Lăk, bal mờ ală ù tiah tờm bè drà tơrgùm phan uă, anih tờm kă bro phan, tiah ơn prap phan, tiah rơndeh ơm, ală tiah sùm geh ngui là tiah tơrgùm phan bơna tìs mờ kơrnoat boh lam, phan ờ ngan, phan đòm. Bơh hơ̆, pơgồp niam mờ mpồl lơh broă geh gơnoar jòi kŭp, kŭp mờ lơh glài ală cau lơh tìs jat jơnau cih bơh adat boh lam dê”.

Bơta rcang lài, kràñ cê jơh nùs bơh mpồl lơh broă geh gơnoar càr Dăk Lăk dê tàm broă rcang lài, tam dră mờ broă lơh lơh gơlik, jun pơndiang, tăc bro phan bơna ờ ngan, phan đòm, phan ờ niam tàm dơ̆ lơh uă tàm tơngai sa tềp nam Ơseh gam cèng wơl ală cồng nha niam ngan. Drà kă bro drơng sa tềp rơ̆p pơn jat tai geh sok sền kơ̆, phan bơna gàr geh bơta niam, pơgồp bơnah nàng làng bol in iang nùs blơi phan, wă rò sa tềp lơngăp lơngai, tơl làm mờ wil tơl.