Jơh gùt càr Dăk Lăk geh 639 nơm hìu gơtìp tơrlah jơh pal lơh pa; 880 nơm hìu ờ diơng kơn jơ̆ ngan mờ 5 rơbô 240 nơm hìu ơdiơng di mơ, gơ pồ rkàng hìu kờñ lơh niam wơl. Tus tŭ do, Dăk Lăk neh sơnđờm mut lơh pa 176 nơm hìu; kờp dŭ tàm poh do rơ̆p pơn jat tai sơnđờm mut lơh mờr 450 nơm hìu mờ pơgăp 233 nơm hìu tàm poh pơn jat tai. Mìng is mpồl hìu lơh niam wơl di mơ sền bal là neh lơh sir; gơwèt mờ hìu lơh niam wơl uă, pơgăp 70% gam tàm tơngai lơh sir, khà gam wơl- uă ngan bơh ală hìu bơnhă dồ nă să- rơ̆p geh mpồl kwang àng, ling klàng, Ling tiah 5 dong kờl, gàr niam lơh sir lài mờ ngai 31/12.

Ồng Tạ Anh Tuấn, Củ tịc Anih duh broă Làng bol càr Dăk Lăk pà gĭt, bơdìh mờ lơh mhar lơh pa mờ lơh niam wơl hìu ơm, càr gam bơsong 47 nă cau sồr pal ntrờn tiah ơm kis pa tài bơh tiah ơm yau gơ ơm tàm tiah tơrlah ù. Do là mpồl lơyài pơndrờm mờ bơta bal dê mơya kung gơ ơm tàm broă lơh lơh sir jat jơnau sồr bơh Thủ tướng Cíñ phủ dê. Càr ai tơlik 2 dơ̆ gròi sền tŭ tơngai mut lơh, hơ̆ là lài mờ ngai 31/12/2025 mờ lài mờ ngai 31/1/2026. Nàng lam lơh dồ ròt bal, càr neh hòi jà rlau 200 tơmàn đong bơh ală cau dong kờl ai broă lơh pa mờ lơh niam wơl hìu ơm làng bol dê. Ndrờm mờ hơ̆, Dăk Lăk lam lơh broă lơh lơh pơgăp 330 nơm hìu pơrjum mpồl bơtiàn pơgồp bal mờ pleh dà tih dà lìu, mờ priă tă lơh pơgăp 600 tơmàn đong. Càr dan mờ Cíñ phủ dong kờl 500 tơmàn đong; bơnah gam wơl rơ̆p pơn jat tai geh hòi jà tă pơgồp bal bơh mpồl lơh sa kă bro mờ ală mpồl cau, ală cau geh nùs nhơm dê.