Jat rơndăp broă lơh gơguh lơh sa, tơngai lơh broă bơh nam 2026-2030, Dăk Lăk ai jơnau kờñ gơguh tai kờp bal bơh 11 tus 11,5% dùl nam; GRDP 5 nam kờp dŭ lơh geh mờr 700 rơbô tơmàn đong. Rơndăp broă lơh tơl nam ndrờm tàm khà 2 nơm khà, bơh 10,2% nam 2026 gơ guh tus 12% tàm nam 2030. Ală bơta gơn kơnờm gơguh lơh sa geh sền gĭt geh broă lơh sa suơn sre bơtàu tơnguh kơnhăp kơ̆, lơh sa mờ măi mok là gah broă tam gơl pràn, ai bơt bơtàu geh gơnoar broă tiah gơguh lơh sa tŭ uă rơndăp broă lơh dờng geh lam lơh. Mơya, qúy 1 nam 2026, khà gơgh GRDP mìng lơh geh pơgăp 7,5%, lơyah uă rlau mờ broă rơndăp lơh geh ai. Ală tiah gơn kơnờm ndrờm gơguh lơyah; tàm hơ̆ bơt bơtàu mìng lơh geh 3,5%. Bơta kwơ ờ tơl tơrgùm tàm drơng broă, bơt bơtàu mờ lơh sa mờ măi mok. Kờp jơh priă bơcri gùt mpồl bơtiàn gơmù pơndờm dùl tŭ bal mờ nam lài.

Mblàng jơnau tờm lơh gơbàn bơta do, ồng Cao Đình Huy, Kwang lam bồ Sờh Bơt bơtàu càr Dăk Lăk đơs là, ală bơta gơ kòl tàm ai ù tiah mờ bơta pràn jak mut lơh gam gơrềng tơn tus gơguh lơh sa: “Bơta gơ kòl tàm tŭ tơngai mut lơh kung bè ai priă bơcri lơh geh kwơ bơh bơt bơtàu dê sền bal là broă ai ù pal đơs là lơyài; dơ̆ 2 hơ̆ là bơta pràn jak bơh ală mpồl mut lơh broă tŭ do dê. Bơh jat sền bàr pe rơndăp broă lơh tŭ do ală mpồl mut lơh broă kung gam lam lơh lơyài, sồr ală cau tờm bơcri priă lơh pal kràñ cê jơh nùs, sồr lơh mhar mờ crăp rcang lơh glài sră pơr gon lơh broă gơwèt mờ ală mpồl mut lơh broă lơyài”.

Gơwèt mờ tiah lơh sa mờ măi mok, jơnau sồr geh ai là pal gờñ tă bơsong bơta kòl yan ală rơndăp broă lơh năng lượng mờ lơh sir phan bơna bơt bơtàu tiah, mpồl lơh sa mờ măi mok nàng kờñ lơh geh jơnau kờñ gơguh rlau 13% tàm tơngai tus. Mò Nguyễn Thị Thu An, Kwang lam bồ Sờh Lơh sa mờ măi mok mờ Kă bro phan pà gĭt, bulah broă lơh neh geh tă bơsong bơh sơn rờp, mơya broă lam lơh kung gam kwi kwơ tài bơh ờ tơl bơta bơto pơlam ngan ngồn: “Jơnau lơh nền tàm pơrjum sồ 253-254 bơh Quôk hội dê pa ai lơh jat neh tă bơsong ai broă lam lơh rơndăp broă lơh năng lượng lơh gơlik wơl, is ồn là tàm tiah kal ke uă. Bulah broă lơh neh pờ mơya ală broă lơh mờ ală jơnau sồr geh ngan tàm ală Jơnau lơh nền bơh Cíñ phủ dê tus tŭ do ờ hềt geh ai lơh jat den tàng ală gah broă kung geh bơta kwi kwơ geh ngan tàm tŭ lam lơh”. 

Đơs broă lơh đơng lam jat tơl gah broă, tơl qúy nàng gròi sền gơguh tai, ồng Đào Mỹ, Phó Củ tịc Anih duh broă Làng bol càr Dăk Lăk đơs là kờñ pal gĭt nền nòn kơnòl broă ngan ngồn: “Broă gĭt loh rlau tai, kờñ pal tam pà loh jat nam, jat gah broă. Tàm kờp jơh phan bơna lơh geh geh 689 rơbô tơmàn đong do kờñ pal tam pà ai nam 2026 kàr lơi, bơh hơ̆ tam pà is ai gah broă in pơn yơu bè broă lơh sa suơn sre kàr lơi, lơh sa mờ măi mok kàr lơi, kă bro phan kàr lơi tơnơ̆ hơ̆ tam cah is qúy bơh hơ̆ sền gĭt pơn yơu bè broă lơh sa suơn sre den gah lơh, phan brê bè lơi, phan tàm dà bè lơi mờ tơl gah broă hơ̆ geh rơndăp broă lơh lơi, phan bơna lơi nàng sền gĭt kơnòl tàm tŭ đơng lam”.

Tềng đăp jơnau kờñ gơguh lơh sa 2 nơm khà tàm tơngai uă bơta gơn kơnờm gam lơyài, ồng Lương Nguyễn Minh Triết, Ƀí thư Tỉñ ủy càr Dăk Lăk sồr pal geh broă bơsong cèng bơta tam gơl pràn, is ồn tàm broă tam gơl pa sră pơ àr gơnoar atbồ mờ gơ hòi gơ jà bơcri priă kwơ màng. Mơkung kờñ pal lơh broă lơh ai lơh lài, tơrmù tơngai lam lơh ală rơndăp broă lơh, lơh geh ù tiah gơguh lơh sa bơh tàm nam 2026 tơn: “Tơrgùm kràn cê jơh nùs tam gơl pa sră pơ àr gơnoar atbồ lơh niam tiah bơcri priă, tơrmù sră pơ àr gơnoar atbồ, tŭ tơngai, priă tă lơh sră pơ àr gơnoar atbồ sền do broă rơndăp lơh cèng bơta tam gơl pràn lam lài tàm tơngai tŭ do bơh càr dê. Lơh geh broă lơh “gùng tơlir” ai ală rơndăp broă lơh ai lơh lài in mờ broă lơh ai lơh lài nàng gơ hòi gơ jà ală rơndăp broă lơh bơcri priă kwơ màng”.