Hoà Thịnh, do là tiah tờm gơtìp dà cò lơh hoàc huơr uă ngan tàm dơ̆ dà cò dờng ngan bơh lài do tàm nhai 11 nam 2025, tŭ do gam jal mhar rơcang pleh lài rềs àr mờ trồ tiah. Bơdìh mờ ală hìu pa geh lơh mờ geh cờn ñhoa nàng pleh mờ dà tih, geh lơh bơh “Broă lơh dờng Quang trung”, 13 nơm hìu pleh mờ dà tih mpồl bơtiàn gam geh lơh. Jăt ồng Phương Văn Lành, Bí thư Đảng ủy sàh Hoà Thịnh pà git, mờ 13 nơm hìu pleh mờ dà tih, tơl nơm hìu geh bơta pràn ai 200 nă cau ơm, sàh gơtùi iang nùs tàm broă jòi geh anih ơm niam ai làng bol in lài mờ tŭ dà tih gơguh.

Broă rơcang cau lơh broă bal mờ tàp jơnau git wă bè dong kờl cau kung geh lơh: “Sàh Hoà Thịnh gam tơrgùm uă ngan gùng dà broă lơh nàng rơcang pleh, rơcang lài mờ rềs àr bơh trồ tiah tàm kàl mìu dà tih dà cò mờr tus. Is ồn ngan, sàh pa do neh lơh 13 nơm hìu pleh mờ dà tih mpồl bơtiàn. Sàh kung neh pơgồp bal mờ Đah Rơcang pleh mờ rềs àr bơh Trồ tiah bơyai lơh tàp jơnau git wă, jơnau git bè rơcang pleh mờ rềs àr bơh trồ tiah, rơcang lài mìu dờng dà tih dà cò ai làng bol in; mờ rơcang tơl rơkì mờ ào pơr đồng ai ală thôn in nàng rơcang lài. Bơdìh hơ̆ tai, sàh kung dờp ală ca nô mờ bơta pràn uă nàng drơng tàm broă rơcang pleh mờ rềs àr bơh trồ tiah in”.

Rềp tơn tềng gah sàh Hoà Thịnh là sàh Hoà Mỹ kung là tiah sùm gơtìp dà tih dà cò pơhìn. Jơnau bơsram ờ git lơh tàm broă rơcang lài rềs àr bơh trồ tiah tàm ƀòn lơgar tàm dơ̆ dà tih dà cò dờng ngan bơh lài tus tŭ do tàm lồi nam lài geh sàh do ai geh jơnau bơsram broă lơh mờng chài uă ngan. Ồng Nguyễn Hữu Thuận, Bí thư Đảng ủy sàh Hoà Mỹ yal: “Bol añ kung neh rơcang lài ai tơl ƀòn in dùl nơm plung geh măi nàng lơh jăt kơnòl dong kờl cau tơn. Tơl thôn bè hơ̆ rơ̆p geh dùl mpồl dong kờl cau geh ală klao pơnu, làng bol lơh broă sa suơn sre dờp lơh”.

Kàl mìu nam 2026, ală anih lơh broă, mpồl lơh broă tàm càr Dăk Lăk neh ai geh gùng dà broă lơh, tŭ lơi kung rơcang lài rơlao 24 rơbô nă kwang bàng, cau ling mờ di pơgăp 35 rơbô nơm phan lơh broă nàng ntrờn làng bol, dong kờl cau gơtìp rềs àr mờ bơsong hoàc huơr bơh trồ tiah lơh aniai di lah geh. Trung tá Phạm Thành Long, Phó Đơng lam bồ, Mpồl Đơng lam rơcang gàr lài tiah 6, gơwèt Mpồl đơng lam Ling klàng càr Dăk Lăk pà git: “Bơyai lơh pà phan bơna, phan lơh broă dong kờl cau gơtìp rềs àr tus 18 mpồl đơng lam sàh tàm càr in nàng gàr tơl khà geh ai ală mpồl lơh broă bal mờ mpồl ling in lơh jăt kơnòl broă. Tàm hơ̆, ai lài rơlao bè khà geh nàng ală sàh tàm tiah di gơlan gơtìp uă, sùm pal kong gơrềng bơh trồ tiah lơh aniai, tàm hơ̆ uă ngan là mìu càl dờng”.