Nam 2024, broă lơngăp lơngai, cíñ trị, rơndăp tăp niam lơngăp lơngai jơh gùt mpồl bơtiàn tàm càr Dăk Lăk geh gàr kơ̆, bulah bè hơ̆ kung gam sơl jơnau pơhìn digơlan lơh roh bơta kơ̆ kơl jăp. Bè lơngăp lơngai cíñ trị tàm dơlam is, geh 81 nă kwang bàng, đảng viên lơh tìs jơnau cih kơrnoăt boh lam dê. Jơnau sră pơyua sră yal sră yă gam kal ke. Bè rơndăp tăp sèng niam lơngăp lơngai jơh gùt mpồl bơtiàn, tàm nam neh gơlik geh rlau 1.130 dơ̆, lơh 21 nă cau chơ̆t. Cồng nha broă lơh rơcăng dră wơl sa kwề sa kwà, bơta ờ niam, nam 2024 càr Dăk Lăk neh lam lòt sền broă lơh jăt ală jơnau sồr bè yah loh làng song dơ pă tàm 30 mpồl lơh broă.

Đơs sồr lơh pơrjum, ồng Nguyễn Đình Trung, Ƀí thư Tỉñ ủy càr Dăk Lăk sồr ală kâp, ală gah pơn jăt tai gàr kơ̆ lơngăp lơngai cíñ trị, rơndăp tăp sèng niam lơngăp lơngai jơh gùt mpồl bơtiàn, bơsong di tŭ ală broă gơlik geh nàng gàr kơ̆ kơl jăp bơtàu tơngguh lơh sa mpồl bơtiàn. Tơrgùm tă pơgồp jơnau đơs ai Mpồl Lơh kơnòl broă sùm Tỉñ ủy càr, Duh broă sùm Tỉñ ủy càr sồr lơh bơsong gơtùi broă ù tiah, broă jơi bơtiàn, broă pin dờn jăt yàng ờ lời ală mpồl cau gơjrañ kơ wềng, pơrlơ̆ dră mờ dà lơgar sơmờm nàng dră aniai.