Bơh drim gờñ, gal ngan làng bol sàh Hoà Thịnh mờ ală sàh rềp bal neh geh mat tàm Rùp kah kơlôi nàng tơngăc ală cau ling. Ală bơta tàm kŭp tê kơ̆, ală bơta tàm koar ngoh rơngăc mờ jơh bal ală dà mat neh lơh geh dùl dơ̆ tàm tơngăc bềng bơta ngoh rơngăc, tơn jơh wơl mờr 2 nhai ling klàng làng bol bal mờ gơ̆p dong kờl tơnơ̆ dơ̆ dà tih dà lìu kah yau. Sền nùs nhơm hơ̆ bơh tàm tŭ gờñ, ùr pơgru Nguyễn Thị Hồng Nhị, hìu bơsram Mầm non Hòa Thịnh – tiah lơh pôs đồng ing bơh ală mpồl ling dê, kung là tiah tam klăc bal nùs nhơm đah cau pơgru, kơnòm bơsram mờ ală cau ling, ngoh rơngăc pà gĭt:“Tàm tơngai kwang bàng, cau ling ơm tàm hìu bơsram den nùs nhơm tam klac bal uă ngan, rềp mềr mờ ală kơnòm bơsram, să tờm ală ùr pơgru kung gơboh ngan, gơboh ală wa cau ling dê, tŭ do tàm tơngăc ală wa cau ling tam klăc ờ kờn ngài. Ngai do là ngai dŭt ndơl tìp ală wa mpồl ling rao, tŭ do nùs nhơm tàm ƀòn ngềt ngơ̆t, ală dơ̆ tăc phan tàm drà den ờ gŏ ală wa cau ling tai, ai tàm ală gơl gùng, hìu làng bol den kung ờ gŏ rùp hin ală wa mpồl ling, tơnơ̆ do ngan ngồn là kah ngan. Tàm nùs nhơm cih kah dà kơl hề bơh ală wa mpồl ling mờ cau ling dê”.

Là dùl tàm ală mpồl ling tus bal tơn tàm ù tiah bơh ngai sơn rờp mìu dờng dà tih lìu, Trung úy Phan Ngọc Dân, Trung đoàn 584, Gah đơng lam Mpồl ling klàng càr Dăk Lăk, pà gĭt neh pa lơh kơnòl broă dong kờl, mơkung bơsong jơnau gơ lời wơl mờ lơh wơl ală hìu ơm dong làng bol tiah dà tih dà lìu in: “Tŭ do, tàm jiơ phuk tàm tơngăc do, làng bol neh guh bơh 5 jiơ àng nàng trŭ gơm phan sa dong bol oh sa drim, tơnơ̆ tŭ sa piang jơh làng bol ñìm uă ngan, ờ khin tus tàm do nàng tàm tơngăc den tàng gơlơh ngoh rơngăc ngan. Tŭ rê wơl tàm mpồl ling ngan ngồn oh mờ ală cau ling bal tàm do rơ̆p kah ngan ală ngai nhai rềp mềr bal mờ làng bol tàm do sơr lèt gan dơ̆ dà tih dà lìu kah yau nàng bơt bơtàu wơl rài kis ai làng bol in”.

Bơh ngai 1/12/2025 tus ngai 10/1/2026, rlau 204 rơbô dơ̆ kwang bàng, cau ling Ling tiah 5, Gah đơng lam Mpồl ling klàng càr Dăk Lăk mờ mpồl ling griăp ƀòn mờ mờr 6 rơbô nơm rơndeh rơndồ măi mok neh geh hòi jà tơrgùm bal, geh tam pà gơs 331 mpồl, lam lơh lơh 331 nơm hìu dong ală hìu bơnhă gơtìp tơrlah tơrlơm jơh mờ lơh niam wơl 90 nơm hìu ờ diơng kơn jơ̆ tàm 13 sàh, sơnah ƀòn. Ndrờm bal mờ hơ̆, ală mpồl ling neh pơgồp bal ntrờn pơgăp 11 rơbô 300 hìu bơnhă mờ rlau 36 rơbô nă cau tus tiah ơm lơngăp lơngai; pơs wàs 207 hìu bơsram, 42 hìu sơnơm, 281 hìu niam chài, 38 hìu lơh broă Anih duh broă Làng bol; bơsong rlau 50 kơi sồ gùng lòt rê, bơtơ̆t rbòng dà drơng broă lơh sa kàl mrềt prang, ală mpồl ling neh lam lơh 50 mpồl, 98 tiah, lơh sir rlau 63 rơbô 220 thơk broă lơh bơt bơtàu.

Phó Củ tịc Anih duh broă Làng bol càr Dăk Lăk ồng Đào Mỹ đơs sùm ală tă pơgồp is ồn dờng màng bơh mpồl ling phàu crong dê tàm sùm broă lơh drơng mờ bơsong jơnau gơ lời wơl tài bơh trồ tiah lơh aniai:“Rùp hin cau ling bơnĕ bơnài bal mờ làng bol bol he kis tàm nùs nhơm bulah kal ke bòl glar mơya cèng bềng nùs nhơm kờñ gơboh bal đah ling klàng mờ làng bol. Hơ̆ là ală rùp hin, ală broă lơh niam bơnĕ ngan. Añ ala mat đơng lam bồ càr ưn ngài uă ngan rlau jơh, jơh nùs ngan rlau jơh tus mờ kwang bàng, cau ling tàm mpồl ling phàu crong đơs bal mờ mpồl ling đơs is tàm 2 nhai do mờ is ồn là “Broă lơh Quang Trung” mờ tŭ do bol he ơm tềng do nàng đơs jơnau tàm tơngăc”.

Tơn jơh wơl dơ̆ tàm tơngăc, Đại tá ồng Cao Văn Mười, Phó Lam bồ tă pơgồp jơnau đơs mờ dong broă Ling tiah 5 đơs nền “Broă lơh Quang Trung” ờ mìng cèng wơl ală hìu ơm kơnhăp kơ̆ lơm, mờ gam là dùl phan lời wơl nùs nhơm uă ngan bè nùs nhơm ling klàng làng bol, bè bơta pràn bơh nùs nhơm kờñ gơboh kòn bơnus mờ mpồl tam klăc dờng dê:“Tơl broă lơh bơt bơtàu, tơl nơm hìu lơh sir ờ mìng là phan bơna lơm mờ gam là pơrya bơh bơta pin dờn, bơh ling klàng làng bol gam sùm, là bơta ram mhŭ bơh nùs nhơm làng bol dê là jơnau đơs nền tiah lơi làng bol gơtìp kal ke tiah hơ̆ geh cau ling. Broă lơh Quang Trung tơn jơh wơl neh tàm pơrdờn bơhiàn ờs mờng mpồl ling bơh làng bol mờ geh, mờ làng bol drơng broă bơh Cau ling Wa Hồ dê, cih tai jơnau cih rài lơngăp lơngai; cơng tàng bơta pràn bơh mpồl tam klăc dờng, bơta mut lơh bal bơh jơh ală anih lơh broă cíñ trị mờ làng bol. Broă lơh Quang Trung tơn jơh wơl mơya tềl lời wơl nùs nhơm cau dê, ală hìu ơm ram mhŭ kơnhăp kơ̆ mờ is ồn là nùs nhơm ling klàng làng bol sơlơ kơ̆ wền".