Jat jơnau yal tàm Pơrjum, nam 2025, kơnòl broă sền gàr Dà lơgar- ling klàng càr dê geh ală kấp, gah broă mờ mpồl ling phàu crong tàm càr dê lam lơh sền bal dùl ròt bal; tiah rcang gàr lài pơn jat tai geh lơh kơ̆kơl jăp; bơta pràn pơgồp bal, drơng mờ bơsong ală bơta digơlan gơlik geh geh yờ tơnguh.

Tàm dơ̆ mìu càl rơbŭt dờng sồ 13 mờ dơ̆ mìu dờng dà tih dà lìu pa do, mpồl ling klàng càr Dăk Lăk neh di tŭ geh mat dong kờl làng bol trờn tiah ơm kis, dong kờl rềs àr, bơsong jơnau gơ lời wơl mờ lời wơl rùp hin niam tàm nùs nhơm làng bol dê. Bulah bè hơ̆, ngan ngồn trồ tiah lơh aniai kal ke neh pà gŏ bơta pràn jak rcang gàr lài drơng broă làng bol mờ mpồl dùl bă tiah tàm bàr pe sàh, sơnah ƀòn gam ờ pràn, ờ tơl bơta rcang lài, kwi kwơ tàm bơyai lơh drơng broă làng bol.

Cồng nha atbồ Dà lơgar bè sền gàr Dà lơgar tàm bàr pe tiah gam ờ hềt pràn; broă lơh tă pơgồp bal jơnau đơs tàm broă rơndăp lơh mờ pơgồp bal mờ bơtàu tơnguh lơh sa- mpồl bơtiàn mờ sền gàr Dà lơgar kung ờ hềt ring bal sơl. Tàm ală bơta hơ̆, càr Dăk Lăk sồr ală tiah mờ mpồl ling phàu crong bơsong jơh ală bơta ờ pràn geh tơngŏ tàm dơ̆ trồ tiah lơh aniai pa do, ngan là tàm mpồl ling rcang gàr lài drơng broă làng bol tàm ƀòn lơgar.