Đại tá ồng Đinh Văn Hưng, Tỉñ ủy viên, Cíñ ủy Gah đơng lam Mpồl ling klàng càr Dăk Lăk đơs nền, tam lơh pha lin Buôn Ma Thuột là pơrya niam ngan bơh nùs nhơm tam lơh khin cha jak chài, nùs nhơm tam lơh tus geh pha lin bơh ling klàng mờ làng bol he dê.

Mơkung sồr kwang bàng, cau ling mpồl ling phàu crong càr pơn jat tai lơh jat niam bơhiàn ờs mờng, tơnguh uă cồng nha pơlam tàp, crăp rcang tam lơh, bơt bơtàu mpồl ling kơ̆ pràn, lơh geh jơnau sồr kơnòl pal lơh tàm bơta pa. Tàm Blàng tơ̆p ƀồc Cau ling chơ̆t màng càr Dăk Lăk- tiah ơm rlô bơh rlau 2 rơbô 300 nă cau ling khin cha jak chài, cau ling chơ̆t màng, tàm nùs nhơm yŭ rơyùm, ală oh mi đơng lam bồ càr mờ cau ala mat neh ơn goàng bơkào, pơdơng chu ñàng tềng đăp Rùp kah kơlôi, lời dùl ết phuk kun bồ kah kơlôi mờ ưn ngài uă ngan ală cau ling khin cha jak chài, cau ling chơ̆t màng neh khin cha chơ̆t phi să tài broă lơh tam lơh tơngklàs jơi bơtiàn, tơrgùm dùl dà lơgar.

Pơn jat hơ̆, mpồl kwang bàng tus chu ñàng kah kơlôi ală cau ling chơ̆t màng chơ̆t phi să tàm Tiah tềl lời wơl Dà lơgar is ồn Hìu jàm Buôn Ma Thuột- tiah neh jàm uă cau jàm cíñ trị tàm srơh tam lơh kăc màng ală nam bồ rài 20 mờ kung là tiah tơnggơs Ci ƀộ Đảng sơn rờp bơh càr Dăk Lăk yau dê.