Mho ngai 20/12, Kwang àng càr Dăk Lăk bơyai lơh pơrjum pờ tơlik tơn tàm internet mờ ală kơnhoàl, ƀòn dờng tàm càr nàng sền wơl ală bơta, broă lơh rcang lài kơryan lơh tìs adat boh lam, rềs àr geh gơrềng tus phăo bơrtoh tàm rơnàng kơnòm bơsram.

Jat jơnau yal tàm pơrjum, mìng tàm poh do tàm càr Dăk Lăk neh gŏ 12 dơ̆, 57 nă kơnòm bơsram bơrlŭ is phăo bơrtoh, uă kơnòm bơsram gơtìp sồt să. Anih lơh broă geh gơnoar neh kŭp rlau 27 kĭ phan ngui bơrlŭ lơh phăo, mờr 300 nai phăo lơh is. Pal đơs ngan là uă dơ̆ tàm bơrlŭ is phăo bơrtoh geh bơta tus bal bơh uă ngan cau bơsram mờ neh gơlik geh uă dơ̆ rềs às nđàc sơngĭt ngan bơh phăo bơrtoh dê lơh gơlik. Anih lơh broă kwang àng neh lam lơh dồ ròt bal, kràñ cê jơh nùs uă broă lơh nàng kờñ rcang lài kơryan, tam dră, kơryan bơta blơi phan bơrtoh nàng lơh is phăo bơrtoh tàm rơnàng kơnòm să is ồn là kơnòm bơsram; pơgồp bal mblàng yal, hòi jà làng bol ngan là ală mè bèp, tơnguh uă bơta gĭt wă mờ nùs nhơm lơh jat adat boh lam bè atbồ, lơh gơlik, jun pơndiang mờ ngui phăo bơrtoh.