Jơnau đơs pơn dŭt dơ̆ lơh broă, Tổng Ƀí thư đơs niam Đảng ủy Quốk hội neh rơcang lài, lơh pràn tàm broă đơng lam, sồr lơh, mùl màl jơh gùng dà broă lơh bơh Đảng; lơh broă lơh adăt boh lam geh uă tam gơl pa mùl màl; kwơ màng bơyai lơh geh cồng nha dơ̆ tĕ khà Quốk hội khă XVI mờ Mpồl duh broă Làng bol ală kấp tơngai bơh nam 2026 tus 2031.

Tàm tơngai tus, Tổng Ƀí thư sồr pơn jăt tai lơh jăt nền nòn Jơnau lơh nền tàm pơrjum bơh Pơrjum dờng dơ̆ XIV dê, pơgồp bal mờ tơl broă lơh, broă rơndăp lơh mùl màl; lơh mhar kơrnoăt boh lam jơh ală gùng dà broă lơh bơh Đảng, tơnguh uă bơta niam lơh adăt boh lam, jăt sền, di pal mờ jơnau kơ̆p kờñ bơh cau tĕ khà bal mờ làng bol. Tổng Ƀí thư đơs nền: Nùs nhơm pin dờn, jơnau kơ̆p gơn mờ cau tĕ khà bal mờ làng bol gùt lơgar pơyoa ờ mìng ơm wơl tàm ală prang sră mờ pal geh tam gơl gơs ală broă lơh di pal, ală adăt boh lam geh bơta niam uă, ală broă lơh jăt sền mùl màl mờ geh cồng nha. Ală gùng dà broă lơh dờng Đảng dê pal geh tam gơl gơs ală broă bơ̆t bơtàu adăt boh lam, ală jơnau lơh nền mùl màl.