Bè 8 tơngume geh sồr lơh sùm là tơrgùm lam lơh jat ală jơnau lơh nền kuơmàng, Tiến sìh ồng Bàn Tuấn Năng, Mpồl cau geh bồ tơngoh bơsram sră kơlôi sơnơng jak chài mờ măi mok kơnòm să Việt Nam, sền gròi uă ngan tus bơta niam chài mờ kòn bơnus: Bơnàng jă nùs nhơm bơh mpồl bơtiàn dê, bơta pràn tàm dơlam is, priă jền mờ bơta gơn kơnờm bơtàu tơnguh bơh dà lơgar dê. Jơnau yal tàm Pơrjum dờng dơ̆ XIV bơh Đảng dê neh đơs sùm “Bơtàu tơnguh kơ̆ kơnhăp lài ngan pal kơnờm tàm kòn bơnus mờ niam chài. Kờñ pal bơt bơtàu mờ lam lơh ndrờm bal ală bơta tờm dà lơgar dê, ală bơta kuơ niam chài, ală bơta kuơ hìu bơnhă mờ niam chài tơm boh bơr bơh kòn bơnus Việt Nam dê lơh jat jơnau kờñ bơtàu tơnguh tàm tŭ tơngai pa…”. Tiến sìh ồng Bàn Tuấn Năng mblàng lơh loh: “Niam chài sùm geh sền là bơta chồl tơnguh, là bơnàng jă nùs nhơm is ồn kuơmàng ngan. Bơnàng jă nùs nhơm hơ̆ lơh gơlik bơta pràn tàm dơlam is, lơh gơlik priă jền kung bè bơta gơn kơnờm nàng bơtàu tơnguh dà lơgar. Is ồn bè tam tơl pràn bơto bơsram bè tàm tơngai lài den bol he neh sền gŏ 2, 3 gùng dà broă lơh bè: ờ sa priă bơsram kơnòm bơsram in, ring bal dùl ƀộ sră măi tàm gùt lơgar… Do là ală bơta tam gơl dờng ngan, kràñ cê ngan mờ Tổng Ƀí thư neh sồr lơh mờ Cíñ phủ, ală Ƀộ, gah broă lơh dà lơgar gam lam lơh”.

Ồng Nguyễn Quang Đồng, Lam bồ Anih kơlôi sơnơng Gùng dà broă lơh mờ Bơtàu tơnguh mblàng yal jơnau (IPS) di nùs ngan bè tơngume Jak chài, măi mok, tam gơl pa bơceh lơh mờ tam gơl sồ: Do là ală bơta gơn kơnờm tờm ngan bơh bơtàu tơnguh dê. Ồng pà git: “Bol he neh sền gŏ broă lơh bơtàu tơnguh ờs mờng tàm 40 nam do tơnơ̆ tam gơl pa neh lơh geh ală bơta pal geh. Dilah ờ geh bơta bơcri pràn ai jak chài măi mok in den ờ gơtùi lơh pràn tam gơl pa mờ tơnguh cồng nha lơh broă, bơh hơ̆ gơtùi tơnguh gơnoar broă bơh Việt Nam dê tàm ală mpồl lơh gơlik phan tàm lơgar mờ ală mpồl lơh gơlik phan gùt plai ù. Den tàng jat añ tam gơl pràn jak chài măi mok là jơnau sồr pal geh bè gùng dà mờ Sră nggal pơrjum dờng neh đơs”.

Ring bal mờ jơnau đơs do, ồng Vũ Hoàng Liên, Củ tịc ală mpồl internet Việt Nam ai tơnggŏ bơta ring bal uă ngan gơ wèt mờ ală pơlam gùng dờng bè bơtàu tơnguh jak chài măi mok, niam chài mờ kòn bơnus geh đơs tàm jơnau yal bè ală sră nggal yal Pơrjum dờng dơ̆ XIV bơh Đảng dê in: “Ngan ngồn là di ngan mờ tŭ niam mờ di mờ ală bơta is ồn mùl màl dê mờ bơta geh ngan Việt Nam, kòn bơnus Việt Nam dê. Bơta sồr lơh bè do là di tŭ ngan mờ tŭ niam bơh Việt Nam dê tàm broă gơtùi lơh gơlik bơta tam gơl pràn bơtàu tơnguh ngan là pal kơnờm tàm jak chài măi mok, tam gơl pa bơceh lơh mờ tam gơl sồ”.