Kờp dŭ tŭ tơngai lơh broă bơh Dơ̆ pơrjum dơ̆ 1 dê là mờr 11 ngai, tam pà gơs 2 dơ̆ (Dơ̆ 1: bơh ngai 06/4 tus ngai 12 nhai 4; Dơ̆ 2: bơh ngai 20/4 tus ngai 23/4). Tàm dơ̆ pơrjum do, Quôk hội rơp lam lơh broă lơh rơndap broă, kwang bàng kâp dờng bơh Mpồl lơh broă sră pơ àr gơnoar atbồ dà lơgar dê, sền sơ wì ring bal 8 rơndap lơh adat boh lam, 1 jơnau rơcang cih jơnau lơh nền tàm pơrjum bè kơrnuat boh lam; mờ kung sền sơ wì, lơh nền ală broă rơndap lơh dờng bơh dà lơgar dê bè bơtàu tơnguh lơh sa – mpồl bơtiàn, sền gàr dà lơgar, lơngap lơngai, priă jền dà lơgar, bơcri priă dà lơgar, càn - tơm dồs dà lơgar tàm tơngai 5 nam tus.

Jat hơ̆, Quôk hội rơp pồ ală gơnoar broă tơn, geh: Củ tịc Quôk hội, Phó Củ tịc Quôk hội, Kwang geh jơng Anih duh broă Lơh kơnòl broă sùm Quôk hội, Củ tịc lơgar, Phó Củ tịc lơgar, Thủ tướng Cíñ phủ, Kwang atbồ Anih cah rơña dờng ngan rlau jơh dà lơgar, Kwang atbồ Viện Kiểm sát làng bol dờng ngan rlau jơh dà lơgar, Kwang atbồ Sền sơ wì jơnau yal priă jền. Bal mờ hơ̆, Quôk hội kung ring bal jơnau sồr tơn pồ gơ wèt mờ ală gơnoar broă gơ wèt Cíñ phủ, geh: ală Phó Thủ tướng Cíñ phủ, ală Ƀộ trưởng mờ ală kwang geh jơng Cíñ phủ bal mờ bàr pe gơnoar broă ndai gơ wèt gơnăp gơnoar. Jat jơnau cih bơh Sơnua boh lam nam 2013 dê, tơnơ̆ tŭ geh Quôk hội pồ, Củ tịc Quôk hội¸Củ tịc lơgar, Thủ tướng Cíñ phủ, Kwang atbồ Anih cah rơña làng bol dờng ngan rlau jơh dà lơgar rơp yal bơr guh at gơnoar broă tềng đap Quôk hội.