Drim do (20/12) tàm Anih tờm Pơrjum Dà lơgar tàm càr lơgar Hà Nội, Mpồl Duh broă Đảng Kộng sản Dà lơgar Việt Nam, Quôk hội, Củ tịc lơgar Kộng hoà Xã hội Củ nghĩa Việt Nam, Anih duh broă Mặt trận dà lơgar Việt Nam mờ Anih duh broă đơng lam Đảng Ling klàng Dà lơgar, Ƀộ Ling klàng bơyai lơh dờng màng ngan Dơ̆ tơngkah kir sơnrai 80 nam Ngai tơnggơs Mpồl Ling klàng Làng bol Việt Nam, 35 nam Ngai chờ jơh gùt làng bol sền gàr dà lơgar. Tus bal dơ̆ tơngkah kir sơnrai geh ală kwang bàng đơng lam bồ, lài do là kwang bàng đơng lam Đảng, Dà lơgar, Mpồl ling klàng, ală kwang bàng kăc màng dờng sơnam, Cau Mè Việt Nam khin cha jak chài, kwang ling bơh ală rài dê.

Pơnrơ ngan tàm dơ̆ tơngkah kir sơnrai là Broă lơh yal yau đơs crih tam ya mờ bơta jòng rlau 30 phuk, geh ală jơnau đơs crih tam ya niam bơnĕ ngan rlau jơh, yal wơl dồ êt jơh ală jơnau kah yau tơlik măt, tam lơh, jai pha bơh Mpồl ling klàng dê kung bè đơs nền gơnoar broă dờng ngan bơh Mpồl Ling klàng làng bol Việt Nam dê tàm broă lơh bơ̆t bơtàu mờ sền gàr Dà lơgar. Wèt tus broă lơh dờng màng ngan do, tơngai lài tàm jơh gùt lơgar neh geh uă broă lơh geh kwơ ngan. Jơh gùt lơgar neh geh rlau 1 rbô 830 broă bơ̆t bơtàu chờ gờm tơngkah kir sơnrai, kờp priă pơgăp 260 tơmàn đong; lam lơh dong kờl priă jền lơh, bơka niam wơl jơnăng duh khuai ai 32 nă cau ling Mpồl Việt Nam Mblàng yal Ling tơngklàs in, mờ kờp jơh priă 2 tơmàn 560 tơlak đong.