Ơm ngài tiah tờm Dà Làc mờr 40 kơi sồ, sàh D’ran tiah geh ƀòn drà dềt yau D’ran niam bơnĕ tiơng pơn rơ ơm di gùl 2 gùng kuèl Ngoạn Mục mờ D’ran (lài do gơ wèt kơnhoàl Đơn Dương, càr Lâm Đồng yau), tiah do gam geh mat hòi ndai là ƀòn drà dềt dòr kuèl kơh. Sàh D’ran, càr Lâm Đồng geh tơng gơs bơh bơta tơmut bal sàh Lạc Xuân mờ ƀòn drà dềt D’ran – ơnàng rlau 240 kơi sồ vuông, khà kờp làng bol 33 rbô nă, tàm hơ̆ rlau 20% là làng bol kòn cau K’Ho, Cru, Mạ, Nùng, Thái… Đảng ƀộ sàh tŭ do geh 51 ci ƀộ mờ rlau 600 nă đảng viên, at gơnoar broă tờm ngan tàm đơng lam bơtàu tơnguh lơh sa - mpồl bơtiàn tàm sàh.

Ồng Trương Quang Kiên – Phó Củ tịc Anih duh broă Làng bol sàh D’ran pà git, kwang bàng, đảng viên mờ làng bol sàh kơp kơnờm Pơrjum dờng dơ̆ XIV bơh Đảng dê rơp geh ală gùng dà broă lơh sền gròi, dong kờl ngan ngồn gơ wèt mờ tiah làng bol jơi bơtiàn dồ êt nă cau: “Sàh geh rlau 20% là cau jơi bơtiàn dồ êt nă cau. Kơp kờñ ngan Pơrjum dờng Đảng dê rơp geh ală gùng dà broă lơh bè ală broă lơh sền gròi, dong kờl gơ wèt mờ làng bol jơi bơtiàn dồ êt nă cau. Geh gùng dà broă lơh krơi is gơ wèt mờ ală tiah làng bol kòn cau tàm sàh nàng lơh bè lơi lơh gơlik bơta niam ai làng bol in bơtàu tơnguh bè lơh sa - mpồl bơtiàn nàng tơnguh priă lơh geh tàm tiah làng bol jơi bơtiàn dồ êt nă cau”.

Nam 2025, kờp jơh rề dia sàh D’ran, càr Lâm Đồng dê geh rlau 192 tơmàn đong, sơrlèt rlau mờ khà kờp dŭ càr jàu. Do là bơnàng jă kuơmàng ngan nàng D’ran mut tàm tŭ tơngai bơtàu tơnguh pa mờ uă jơnau kờñ dờng tàm nam 2026, bơh bơtàu tơnguh lơh sa - mpồl bơtiàn, sền gàr dà lơgar – lơngap lơngai, tam gơl wơl sră pơ àr gơnoar atbồ, tam gơl sồ tus tơnguh niam rài kis phan bơna, nùs nhơm làng bol dê. Ồng Mai Linh Sơn, Củ tịc Anih duh broă Mặt trận dà lơgar Việt Nam sàh D’ran đơs nền bơta kơp kờñ bơh làng bol dê tàm pơrjum dờng dơ̆ 14 bơh Đảng dê, ngan là tàm tŭ tơngai lam lơh broă lơh gơnoar atbồ ƀòn lơgar 2 kâp, gàr rềp làng bol, sền dờng màng làng bol mờ tài làng bol: “Añ pin dờn, kơp kơnờm ngan tàm Pơrjum dờng dơ̆ XIV bơh ảng dê. Añ kung bè Làng bol kơp kơnờm ngan tàm tơngai tơnơ̆ do. Mờ broă lơh tŭ do bol he gam lam lơh broă lơh gơnoar atbồ ƀòn lơgar 2 kâp là gàr rềp làng bol, sền dờng màng làng bol mờ lơh jat bta kơp kờñ bơh làng bol dê. Tŭ Jơnau lơh nền tàm pơrjum dờng dơ̆ 14 bơh Đảng dê geh lơh jat ngan ngồn rơp dong tơnguh niam rài kis làng bol m bơtàu tơnguh lơh sa mpồl bơtiàn sàh dê, dà lơgar ngai sơlơ bơtàu tơnguh rlau. Ngui niam gơnoar broă bơh kwang bàng lơh broă sa priă nhai dà lơgar dê wă wờng, geh kơnòl lam lơh kơnòl broă geh Đảng, Dà lơgar jàu”.

Lâm Đồng tŭ do là càr geh bă ù ơnàng ngan rlau jơh Việt Nam mờ rlau 24 rbô 200 kơi sồ vuông, khà kờp làng bol rlau 3 tơlak 800 rbô nă cau. Đảng ƀộ càr Lâm Đồng tŭ do geh rlau 124 rbô nă đảng viên pơrjum tàm 128 mpồl lơh broă Đảng kâp hơđang ƀòn lơgar. Mờ bơta pin dờn jơh nùs ngan tàm bơta đơng lam bơh Đảng dê, kwang bàng, đảng viên mờ làng bol càr Lâm Đồng kơp gơn, pin dờn Pơrjum dờng dơ̆ XIV bơh Đảng dê rơp lơh geh ală jơnau lơh nền tam gơl pràn lam dà lơgar mờ ală tiah mut tàm rài bơtàu tơnguh pa.