Drim ngai 13/1, tàm Anih tờm Pơrjum Dà lơgar, Kwang bàng Ƀộ Cíñ trị, Duh broă sùm Mpồl đơng lam Đảng Dà lơgar ồng Trần Cẩm Tú, Lam bồ Mpồl dềt Rơndăp tăp sèng drơng broă Pơrjum dờng cau ala mat gùt lơgar dơ̆ 14 bơh Đảng dê neh đơng lam dơ̆ sền sơwì ală broă lơh rcang ai broă lơh cíñ trị is ồn kwơ màng bơh Dà lơgar dê.

Duh broă sùm Mpồl đơng lam Đảng Dà lơgar neh lòt sền tơn broă lơh bơka, broă wă năc tàm tiah pơrjum; phan bơna bơt bơtàu Anih tờm Sră ƀăo, Anih tờm Đơng lam bơh Ƀộ Kwang àng, ală cơldŭ lơh broă geh gơnoar, broă lơh lơh sơnơm mờ ală broă lơh gàr niam lơngăp lơngai, ờdo ờdă. Bơh lòt sền, ală tơngume sền bal lơh geh jơnau kờñ, di mờ tŭ tơngai geh ai. Duh broă sùm Mpồl đơng lam Đảng Dà lơgar sồr ală mpồl lơh broă pơn jat tai pơgồp bal niam, kờp sền nền nòn nàng tam gơl niam tơl bơnah broă, rcang niam ngan ai dơ̆ sền sơwì Pơrjum dờng Đảng dê. Gơwèt mờ ală jơnau đơs jơnau dan tơnơ̆ dơ̆ sền sơwì bơh sơn rờp, Duh broă sùm Mpồl đơng lam Đảng Dà lơgar sồr ală Ƀộ, gah broă mhar pơgồp bal bơsong, lơh jat niam jơnau pal jat, jơnau sồr, mờ jơnau kờñ uă ngan rlau jơh là gàr niam Pơrjum dờng cau ala mat gùt lơgar dơ̆ 14 bơh Đảng dê geh bơyai lơh geh cồng nha, lơngăp lơngai, yŭ rơyùm mờ di mờ jơnau kờñ cíñ trị.