Lơh jat jơnau sồr lơh bơh Thủ tướng Cíñ phủ dê, Gah đơng lam Mpồl ling klàng càr neh rcang lài tă pơgồp jơnau đơs mờ Anih duh broă Làng bol càr mờ Mpồl đơng lam rcang gàr lài drơng broă làng bol càr lam lơh broă lơh, sền gĭt dong làng bol gờñ geh hìu ơm lơngăp lơngai, bè ờs là kơnòl broă tờm, ai lơh lam lài ngan.

Mpồl ling tờm geh mpồl duh broă sùm mờ ling griăp ƀòn neh tus bal tơn ai ù, lơh niam wơl, lơh hìu ơm ai ală hìu bơnhă gơtìp hoàc huơr in. Tàm kờp jơh 35 nơm hìu geh lam lơh, geh 6 nơm hìu lơh pa mờ 29 nơm hìu lơh niam wơl, jơh ală ndrờm lơh sir lơm mờ tàm jàu ai làng bol in lài mờ tơngai geh pơrgon. Kờp jơh priă tă lơh rlau 2 tơmàn 900 tơlak đong, hòi jà tơrgùm bal bơh kes priă càr, ală gah dong kờl mờ mờr 2 rơbô 500 ngai lơh broă bơh kwang bàng mờ cau ling dê.