Bơh nhai 7 tus nhai 10 pah nam, plai sầu riêng tàm Tây Nguyên mŭt tàm tơngai pik uă, lơh gơlik bơta pràn gơn kơnờm uă ngan ai tăc mờ lơgar ndai biăp plai chi in. Jăt ồng Nguyễn Văn Mười, Lam bồ Anih lơh broă drơng kơnòl đah Jum, Mpồl Cau lơh sươn Việt Nam, 7 nhai bồ nam 2026, tăc mờ lơgar ndai biăp plai chi gơguh pơgăp 43% pơndrờm bal dùl tŭ mờ nam lài. Is sầu riêng nhai 7 neh cèng tê rlau 1 tơmàn dolar Mỹ.

Bulah bè hơ̆, bơh ngkời ală khà gơguh tai là dùl jơnau lơh dờng rlau: lơh bè lơi gàr drà tŭ ală lơgar blơi ngai sơlơ tơngguh uă jơnau sồr, mờ tàm pơrlòng kung ngai sơlơ kràñ ngan. Mờ sầu riêng, Lo tŭ do geh tus rlau 90% drà tăc mờ lơgar ndai. Tàm tŭ hơ̆, bơdìh mờ Thái Lan, geh tai Philippines, Campuchia, Malaysia mờ Lào kung tăc sầu riêng tàm drà do. Nàng gàr geh lơh sa, gàr drà tăc kơ̆ kơl jăp, jăt ồng Nguyễn Văn Mười, pal sền gròi uă rlau tus bơta niam ala tài pơn jăt tai rề ơnàng bă ù: “Tŭ nhai kàl lơh sa tơrgùm tàm dùl tơngai, broă tăc blơi rơ̆p tìp uă kal ke. Jơnau lơh gơlik là lơh bè lơi nàng bơsong geh bă ù, khà tŭ do geh, mơkung gàr priă lơh geh ai cau lơh broă sa in. Kờñ lơh geh bơta hơ̆ den pal geh jơh bal dùl ròt anih lơh gơlik gah phan. Mpồl lơh sa kă bro lơh niam drà, lơh gơlik phan mờ sền gàr prăp gàr, ai cau lơh broă sa pal tơrgùm lơh niam broă bơta niam. Geh bè hơ̆ den hơ̆ sồng tàm pơrlòng geh mờ ală lơgar geh bal gah phan”.

Bơh jơnau sầu riêng, dùl jơnau sồr ndai kung geh ai tơlik sơl: ờ gŏ di ntoăt pơrlòng jăt khà lơh geh mờ pal lơh sa jăt jơnau sồr drà dê. Việt Nam tŭ do geh uă bơta biăp plai chi geh tơl pràn tăc mờ lơgar ndai, bè prìt, pơ ồ, gơ àl, pơnăt, bung…Dùl gơnru phan ờ lơh geh jơnau sồr pal lơh jăt digơlan lơh gơrềng tus bơngă bơh jơh gùt tiah tam dê, geh tŭ lơh gơrềng tus jơnau tơl pràn gàr drà. Ồng Nguyễn Đình Tùng, Kwang Lam bồ Vina T & T Group – Phó Chủ tịch Tơrgùm ală mpồl biăp plai chi Việt Nam đơs là: mpồl lơh sa kă bro mờ cau lơh gơlik pal gĭt nền loh jơnau sồr bơh tơl drà dê bơh sơnrờp tơn.

“Tơl drà geh dùl jơnau sồr krơi is. Pơnyơu, Mỹ sồr ờ gŏ di ngui 7 dà sơnơm mờ khi ờ ai, tàm tŭ EU geh tus 36 dà sơnơm ờ ai. Ai Lo den sền gròi wơl broă cadimi…Tài bè hơ̆, kờñ mŭt tàm drà lơi, lài ngan bol he pal lơh geh di ală jơnau sồr pal jăt bơh drà hơ̆ dê. Broă dơ̆ bàr là tŭ neh mŭt geh tàm drà, pal gàr geh bơta niam phan bơna. Mờ broă dơ̆ pe là bơ̆t bơtàu măt kă bro nàng tăc blơi phan bơna niam rlau. Geh tơl pe jơnau do den tăc mờ lơgar ndai biăp plai chi digơlan lơh geh cồng nha mờ bơtàu tơngguh kơnhăp jŏ”.