Nhai 12 mờ tàm tiah đah mat tơngai mut càr Lâm Đồng dê kung gam geh mìu sơl. Tàm ală gơl gùng lòt rê tờm bơh càr dê, bè: Gùng Dà lơgar 20, 27, 27C, 28, 28B… ƀuơn ngan gơtìp ală tiah tơrlah ù jơh bal gah pơng gàr đah đơm mờ pơng gàr đah đang gam geh bơsong wơl. Bal mờ hơ̆ là ală hoàc huơr tài bơh mìu dờng dà tih dà lìu lơh gơlik tàm dùl ròt ală gơl gùng tàm tiah koèl kơh, bơh koèl kơh Prenn, Mimosa, D’ran tus Đại Ninh, Sông pha, Gia Bắc… Tài bơh mìu dờng dà tih, dà lìu, bơh uă nhai do ală mpồl lơh broă geh gơnoar bơh càr Lâm Đồng dê lơh ngan lơh broă jơh bal ngai mang tàm tơl tiah ngơr bam dà, tơrlah ù sơbơng roh mờ sùm tàm nùs nhơm crăp rcang lơh tai ală tiah ơm gak nàng gàr niam lơngăp lơngai lòt rê tàm gùng ai làng bol in.

Bi Nguyễn Duy Hưng, ling griăp ƀòn sàh Hiệp Thạnh, càr Lâm Đồng sùm tus bal ơm lơh broă tàm tiah ngơr bam dà tàm gùng Dà lơgar 20 tàm sơnĕ 3 K’Rèn, pà gĭt: “Bol añ ơm gak gàr niam lòt rê tàm gùng ai làng bol in, tam pà gùng lòt rê lòt tàm ală gơl gùng nàng lik bơh tiah ngơr bam dà. Oh mi tam pà gơs 2 mpồl ơm gak bơh bồ đah do tus bồ đah ne tiah ngơr bam dà dê. Añ crăp rcang ơm gak tàm tiah do nàng sền gàr lơngăp lơngai ai làng bol in lòt rê tàm tiah do geh lơngăp lơngai rlau tai”.

Tàm sùm dơ̆ mìu dờng dà tih dà lìu, mpồl kảñ sát gùng lòt Kwang àng càr Lâm Đồng lơh broă ờ geh ngai ơm rlô, ờ kờp ngai mang sùm geh mat tàm tơl gơl gùng lòt rê nàng bơto pơlam mờ dong kờl ală rơndeh rơndồ lòt rê lơngăp lơngai. Thiếu tá Nguyễn Duy Hùng, Kwang àng sàh Đơn Dương, pà gĭt, ală ngai mìu dờng dà tih dà lìu, kwang àng, cau ling mpồl lơh  broă geh hòi jà tơrgùm bal uă ngan rlau jơh nàng lơh kơnòl broă:“Kwang àng sàh Đơn Dương ai mpồl ling tờm mờ mpồl lơh broă lơngăp lơngai tàm ƀòn lơgar ơm lơh broă jơh ngai mang. Gơwèt mờ ală làng bol gơtìp kal ke dong kờl jun pơnđiang phan ntrờn làng bol lik bơh tiah dà tih dà lìu sơbơng roh. Tàm ală gơl gùng lòt rê mpồl kảñ sát gùng lòt pơgồp bal mờ mpồl Kwang àng sàh tam pà mpồl rơndeh lòt rê tàm ală tiah tờm geh bơta pơhìn gơtìp ngơr bam dà”.

 Tàm dơ̆ mìu dờng dà tih dà lìu bơh ngai 16/11 tus ngai 5/12 tàm ală gơl gùng lòt rê bơh càr Lâm Đồng dê neh gơlik geh rlau 350 tiah tơrlah. Geh tŭ tơngai anih tờm Dà Làc ơm tềng đăp bơta pơhìn tam cah is tŭ koèl kơh D’ran, Mimosa, Prenn dùl dơ̆ lĕ gơtìp gơkòl gùng lòt rê tài bơh tơrlah ù tàm tŭ 2 gơl gùng koèl kơh gam wơl, geh: Sacom Tuyền Lâm, Tà Nung kung gơtìp tàm bơta lơh broă ơm gak gơn tơrlah ù, gơ kòl gùng lòt rê.

Nàng bơsong wơl, gàr geh gùng lòt rê tờm đơng lam bồ càr Lâm Đồng bal mờ ală sờh, gah broă geh gơnoar tàm trồ mìu dờng dà tih dà lìu, tơrlah ù kung gam geh mat tàm tơl gơl gùng, hòi jà uă ngan rlau jơh mpồl cau, rơndeh rơndồ ơm lài tàm gùng, ơm lơh broă tàm koèl kơh nàng bơsong ing mơkung lơh broă rơndăp lơh kơnhăp kơ̆ jŏ jòng ai tơl tiah, gơl gùng gơtìp tơrlah ù in.

Ồng Nguyễn Hồng Hải, Phó Củ tịc Anih duh broă Làng bol càr Lâm Đồng tŭ ơm tàm tiah tơrlah ù kung bè tàm ală dơ̆ pơrjum mhar tàm trồ mang ndrờm sơñio loh làng tơl bơta gam geh ờ niam, jơnau tờm gơ lam tus tơrlah ù mờ broă lơh bơsong wơl:“Koèl kơh Prenn lơh sir rao mờ tŭ do bơh dơ̆ ai lòt rê gơlik geh uă jơnau ngan. Ờ geh kơlik kơryan kơ̆ den tàng bràs gơ hoài mù. Brong  yuh dà lơh brong ndơ̆p uă gơl gùng dà ờ gơtùi mut tàm brong là dà hơ hòr lìu tàm pơnggàr đah đơm. Bơh ală bơta bè hơ̆ sền gĭt là pal geh broă lơh ai gơ in ndrờm pal. Rcang lài tàm jàu kơnòl broă drơng ală tiah in, drơng ală broă lơh bơt bơtàu mờ geh bơta pơhìn tơrlah ù nàng rcang lài tàm broă lơh nàng bơsong, lòt sền lài lài mờ tŭ, tàm tŭ mờ tơnơ̆ mìu dờng dà tih dà lìu”.

Tàm tơngai mìu dờng dà tih dà lìu, tơrlah ù gơlik geh rơndăp rơndồl, tàm uă tiah tàm jơh ală ù tiah dê, bơta lơh ngan bơh gơnoar atbồ mờ mpồl lơh broă geh gơnoar càr Lâm Đồng dê tàm broă gàr niam lơngăp lơngai lòt rê tàm gùng geh làng bol jờng rơ uă ngan. Bi Trần Văn Hoàng, ƀòn drà Nhà Chung, sơnah ƀòn Xuân Hương- Dà Làc, pà gĭt:“Añ gŏ kảñ sát gùng lòt do, den mpồl ling, cau ling griăp ƀòn dong kờl làng bol pal đơs là niam ngan.Mpồl lơh broă geh gơnoar lơh broă tàm tơngai mìu càl geh cồng nha ngan, niam ngan”.

Ồng Hồ Văn Mười, Củ tịc Anih duh broă Làng bol càr Lâm Đồng, đơs nền:“Tàm dơ̆ mìu dờng dà kŏ dà lìu pa do tàm ù tiah do dê sùm gơlik geh ală bơta aniai is ồn ngan là gùng lòt gơtìp tơrlah ù sùm. Jơh ală anih lơh broă cíñ trị mut lơh bal niam ngan mờ nganlà 2 mpồl ling klàng mờ Kwang àng. Ală gùng lòt tàm tơngai gờñ ngan rlau jơh bol he pal bơsong ờ gŏ di lời gơ kòl gùng mut tàm Dà Làc is ồn là koèl kơh Mimosa mờ koèl kơh Prenn. Đơng lam bồ Ƀộ, gah broă Dà lơgar jờng rơ uă ngan. Koèl kơh Mimosa tơrgùm lơh ngan tàm pơgăp 8 ngai bol he lơh gơtùi broă lơh bơt bơtàu do mờ ai rơndeh lòt rê bè ờs. Ƀộ Bơt bơtàu neh sền sơwì mờ đơs bơta chài măi mok lơh broă niam ngan lài mờ tŭ ai rơndeh lòt rê”.

Tàm ală ngai mìu dờng dà tih dà lìu pa do, bơta mut lơh bal kràñ cê jơh nùs bơh gơnoar atbồ càr Lâm Đồng bal mờ nùs nhơm geh kơnòl, ờ kờp ngai mang bơh mpồl lơh broă geh gơnoar, kwang àng, mpồl ling klàng dê neh pơgồp bơnah sền gàr ai gùng lòt rê tờm bơh càr dê geh ai lòt rê niam. Đơs là trồ tiah lơh aniai ngai sơlơ kal ke, ờ gơtùi gĭt lài, bal mờ broă mhar ngan bơsong bơta hoàc huơr nàng gàr niam gùng lòt rê, càr Lâm Đồng kung gam gơ jal ngan geh ală broă lơh geh ngan nàng kờñ lơh ală gơl gùng ngai sơlơ kơ̆ nhăp mờ lơngăp lơngai rlau tai.