Tàm dơ̆ lơh broă, Phó Củ tịc Quôk hội đơs niam nùs nhơm rơcang lài, geh kơnòl bơh sàh dê tàm broă lơh rơcang. Ală kơnòl broă geh lam lơh jơh nùs, kràñ cê, gàr tŭ tơngai hơ pơrgon jat jơnau sồr; broă lơh cribơyai, rơcang kwang bàng geh lơh di broă rơndap lơh; bơta lơngap lơngai rơndap tap sèng geh sơlơ gàr kơ̆, lơh gơlik bơnàng jă ƀuơn ƀuài ai ngai tĕ khà in.

Bè kơnòl broă tàm tơngai tus, Phó Củ tịc Quôk hội sồr sàh pơn jat tai pơlam lơh jat wil tơl ală sră nggal sồr lơh bơh dà lơgar mờ Mpồl duh broă tĕ khà dà lơgar dê; rơcang wil tơl tơl broă nàng ngai tĕ khà ngan ngồn gơ gơs là ngai chờ bơh jơh gùt làng bol dê. Bơta tờm là sơlơ bơto pơlam mờng chài lơh broă ai ală mpồl tĕ khà, jơnum tĕ khà in; mờ kung rơndap lơh tiah đùh sră jak chài, gi gùng mut, lik mờ lir mat cau tĕ khà wil tơl, loh làng.