Mpồl ling sền gàr tiah nhàr lơgar càr Dăk Lăk git nền, lơh gơs jak ngan kơnòl pal lơh đùh sră tĕ khà gờñ, mờ kung gàr niam ờdo ờdă jơh ală bơta tàm dơ̆ tĕ khà. Mpồl lơh broă bơh Mpồl đơng lam Mpồl ling sền gàr tiah nhàr lơgar càr Dăk Lăk dê neh lòt sền tàm ală mpồl, geh: Ală pôs ling sền gàr tiah nhàr lơgar Ea H’Leo, Ia Rvê, Yok M’Bre, Srêpôk, Bo Heng, Yok Đôn, Mpồng nhàr lơgar Dăk Ruê mờ Tiểu đoàn pơlam tàp – kơ động.

Tàm ală mpồl, mpồl lơh broă neh iat đơng lam ală mpồl yal cồng nha broă lơh rơcang tĕ khà, tàm hơ̆ tơrgùm tàm broă pơlam lơh jat ală sră nggal sồr lơh bơh kâp hơđang dê; broă lơh mblàng yal, bơto bơtê adat boh lam bè tĕ khà ai kwang bàng, cau ling mờ làng bol tiah nhàr lơgar in; broă lơh gàr niam lơngăp lơngai, rơndap tap sèng, ờdo ờdă tiah đùh sră, rơcang phan bơna, bơka tiah đùh sră, thùng ơn sră pồ tờm mờ thùng ơn sră pồ bơ tơl drơng tĕ khà gờñ.

Gơ wèt mờ ală mpồl bơyai lơh tĕ khà gờñ, mpồl lơh broă tơngkah kâp ủy, đơng lam ală mpồl kờñ pal pơgồp bal nền nòn mờ gơnoar atbồ tàm ƀòn lơgar lơh niam broă lơh rơcang, gàr tiah đùh sră geh lơh yŭ rơyùm, di jơnau sồr; rơcang wil tơl ală thùng ơn sră pồ bơ tơl nàng bơyai lơh tĕ khà ntrờn làm bă tiah tàm ală anih sền gàr tiah nhàr lơgar, lơh gơlik bơta ƀuơn nàng kwang bàng, cau ling gam lơh kơnòl pal lơh in kung gam gơtùi tĕ khà wil tơl, gàr di jơnau cih bơh adat boh lam dê.