Tŭ làng bol mŭt tàm Anih tờm Drơng broă lơh sră pơ-àr gơnoar atbồ dà lơgar sơnah ƀòn Hội Phú, càr Gia Lai, robot AI neh rơcang còp să, lùp lăp, sền đal jơnau kờñ mờ bơto sồr lơh ală sră nggal dê. Do là jơnau robot bơto sồr 2 nă bơyô gam kơnòm să tus lơh sră nàng dăn cih măt tam bao: “Nàng lơh sră pơ-àr dan cih măt tam bao, bơyô pal rơcang sră yal tam bao jăt jơnau neh geh cih lài dờp tềng anih lơh broă, sră kim ta làng bol gam geh ngui nàng lơh cơng să jan, sră dờp ƀòn ơm kis bơh ùr bơklao dê, cau klao pal tơl bơh 20 sơnam, cau ùr tơl bơh 18 sơnam”.

Mờ bơta pràn lùp sền mờ hơ jơnau lùp bơh ală jơnau lùp gơrềng tus mờ sră pơ-àr dan cih măt tam bao, gơnoar ngui ù, lơh hìu, hìu ơm kis…, robot AI dong kờl làng bol git loh bơnah sră nggal, broă lơh kung bè anih lơh broă dờp sră pơ-àr mhar mờ ƀuơn ngan. Ồng Nguyễn Mạnh Thi tus lơh sră pơ-àr kờñ tam gơl gơnoar ngui ù pà git, phan lơh broă pa ngan do lơh ồng gơlơh ni sơna ngan: “Bơto sồr añ niam ngan, tus tàm anih lơh broă geh còp să añ, bè jơnau kờñ tus tềng anih lơh broă lơi nàng lơh sră pơ-àr den robot rơ̆p lam añ tus di mờ anih lơh broă hơ̆ tơn. Cau dờng sơnam den uă tŭ ờ git tă sồ, den he kờñ tus tơwơl cồng nha ha là đah ù tiah, lơh hìu den he đơs mờ robot geh jơnau bơto mờ lam he tus tềng anih lơh broă hơ̆ tơn”.

Jăt ồng Trần Công Danh, kwang bàng lơh broă tàm Anih tờm drơng broă lơh sră pơ-àr gơnoar atbồ lơgar sơnah ƀòn Hội Phú pà git, robot AI ngăc ngar geh Anih duh broă Làng bol sơnah ƀòn bơcri priă blơi mờ ai ngui bơh nhai 8 nam 2025. Nàng lơh broă geh cồng nha, robot geh tơmŭt tơl jơnau tơngit gơrềng tus ală sră pơ-àr gơnoar atbồ lơgar dê, bơnah sră nggal, broă lơh bal mờ sùm geh “bơto sồr” nàng tơnguh uă bơta pràn lùp lăp broă lơh mờ làng bol. “Kòn robot AI do geh tơmŭt jơnau tơngit gơrềng tus ală broă lơh sră pơ-àr gơnoar atbồ dà lơgar dê nàng dong kờl làng bol ƀuơn tàm broă lùp sền nàng git. Broă lài ngan bol añ ai tơmŭt ală jơnau yal tơngit sră pơ-àr gơnoar atbồ lơgar, ală sră pơ-àr geh kwơ mờ broă lơh ală sră nggal hơ̆, broă tă sồ, jơnau bơto sồr làng bol tus tềng ală anih lơh broă nàng lơh ală sră nggal den he ai geh ală jơnau yal tơngit gơrềng bal nàng robot dờp mờ wă, kung bè sùm bơto nàng robot git wă ală broă lơh”. 

Jăt jơnau kờp, pah ngai robot AI tàm sơnah ƀòn Hội Phú dong kờl, pơlam ai rơlao 100 dơ̆ làng bol tus bơsong sră pơ-àr gơnoar atbồ lơgar. Kơnờm mờ broă dong kờl bơh robot AI do, khà bơsong sră nggal mờ tơrwơl cồng nha di mờ jơnau neh pơrgon tềng Anih tờm Drơng broă lơh sră pơ-àr gơnoar atbồ lơgar sơnah ƀòn Hội Phú uă nhai pơn jăt tơn geh rơlao 95%. Ồng Hoàng Minh Nghĩa, Phó Củ tịc Anih duh broă Làng bol sơnah ƀòn Hội Phú đơs nền, broă ngui măi mok IA neh cèng geh cồng nha loh làng tàm broă lơh niam sră pơ-àr gơnoar atbồ lơgar tàm sơnah ƀòn, ai geh gùng dà broă lơh pa, đềt mềr rơlao tàm broă drơng làng bol mờ mpồl lơh sa kă bro in. “Măi neh bơto sồr den bơta di uă ngan, jơnau tơngit neh geh tơmŭt tơl den làng bol di nùs ngan. Ală cau lơh broă rơ̆p geh uă tơngai kơlôi sơnơng rơlao tàm broă lơh ala mờ broă pal mblàng. Di lah pal mblàng den rơ̆p roh uă ngan tơngai lơh broă, tŭ do măi robot dong kờl den cau lơh broă kơlôi sơnơng tàm broă lơh den khà broă lơh geh bơsong uă rơlao, bơsong mhar mờ ờ hoan gơlời”.