Tàm Pơrjum hòi jà bơcri priă nam 2026, càr Gia Lai neh jàu jơnau lơh nền gùng dà broă lơh bơcri priă mờ kĭ hơ sră cih kah ai kờp jơh 273  rơndăp broă, mờ kờp jơh priă dan bơcri lơh mờ kờp dŭ gơguh tus 850 rơbô tơmàn đong (ndrờm mờ rlau 33 tơmàn dolar Mỹ). Tàm hơ̆, 144 rơndăp broă lơh dờp jơnau lơh nền gùng dà broă lơh bơcri priă lơh mờ khà priă rlau 230 rơbô tơmàn đong mờ 129 rơndăp broă lơh kĭ hơ sră cih kah mờ rlau 620 rơbô tơmàn đong. Uă Tập đoàn dờng neh kĭ ală rơndăp broă lơh rơbô tơmàn đong bè: VinEnergo (năng lượng lơh gơlik wơl – 210 rơbô tơmàn đong), Tập đoàn FLC (lòt nhơl, logistics – 150 rơbô tơmàn đong), Phú Tài (phan bơna bơt bơtàu pa, kă bro ù tiah hìu đam- 26 rơbô 500 tơmàn đong) mờ Sun Group (lòt nhơl ơm rlô să- 20 rơbô tơmàn đong)... Ala mat ai ală mpồl lơh sa kă bro gam lam lơh uă rơndăp broă lơh dờng tàm ù tiah do dê.

Ồng Trần Bá Dương, Củ tịc Mpồl  duh broă atbồ, Kwang lam bồ dờng Tập đoàn Thaco, neh geh ală jơnau đơs tàm pơrjum, ồng pà git: “Tàm Gia Lai, tàm 7 nam do, broă lơh adat boh lam gơtìp ơm ing, mờ tŭ tơmŭt bal càr Gia Lai den broă lơh adat boh lam geh sền gròi tă bơsong mờ sơlơ tơnguh dùl bă niam ngan. Ală rơndăp broă lơh geh jơh nùs lam lơh mờ kwơ màng ngan rlau jơh là bơta lòt bal jơh nùs bơh gơnoar atbồ ală kấp càr Gia Lai dê bè tàm tơngai pa do den bol añ hơ rơ̆p lơh jat mhar mờ geh cồng nha ală rơndăp broă lơh, pơgồp bơnah lơh geh dùl rài broă lơh sa suơn sre kơ̆ kơnhăp ai càr Gia Lai in”.
Ală khà niam ngan tàm pơrjum là bơnàng jă mờ bơta gơn kơnờm nàng càr Gia Lai in tam gơl pràn, lơh geh jơnau kờñ gơguh lơh sa 2 nơm khà sồ bơh tàm nam 2026 tơn. Nàng lơh ngan ngồn ală jơnau hơ, ồng Thái Đại Ngọc, Ƀí thư Tỉñ ủy càr Gia Lai sồr ală kấp gơnoar atbồ pal lơh jat kơnòl broă jat jơnau pal jat “6 loh”: loh cau, loh broă, loh tŭ tơngai, loh kơnòl, loh cồng nha mờ loh gơnăp gơnoar, ờ gŏ di lời ală rơndăp broă lơh mìng ơm ing tàm pơ àr lơm; Hơ bơt bơtàu dùl broă lơh sră pơ àr gơnoar atbồ drơng broă, sền “Cồng nha bơh mpồl lơh sa kă bro là bơta bơtàu tơnguh bơh càr dê” mờ rơ̆p kràñ cê jơh nùs bơsong tơl broă lơh lơh lơngeh lơngañ ai cau bơcri priă in; mơkung kơ̆p kờñ ală mpồl lơh sa kă bro ờ mìng lam lơh rơndăp broă lơh di mờ tŭ tơngai lơm mờ gam pal đềt mềr jŏ jòng, sền dờng màng bơhiàn niam chài is ală tiah dê mờ sơlơ tơnguh tai lơh bal mờ ală mpồl lơh sa kă bro tàm càr nàng tus bal jrô tàm ală broă lơh tăc phan gùt plai ù".

Bơh ală cồng nha lơh geh tàm pơrjum, Ƀí thư Tỉñ ủy càr Gia Lai ồng Thái Đại Ngọc đơs nền nùs nhơm lơh ngan tam gơl ală jơnau hơ bơcri priă lơh gơ gơs ală rơndăp broă lơh geh ngan, cèng wơl cồng nha ngan ngồn ai bơtàu tơnguh lơh sa- mpồl bơtiàn in: "Gia Lai hơ sùm lòt bal, lơh geh ală bơta ƀuơn ngan rlau jơh nàng ală mpồl lơh sa kă bro, cau bơcri priă in iang nùs bơcri priă, lơh sa, kă bro, bơtàu tơnguh bal mờ geh cồng nha bal. Bol añ kơ̆p kờñ mờ pin dờn là Gia Lai rơ̆p ờ mìng là tiah tus geh uă bơta ƀuơn bơta pràn, lơngăp lơngai lơm, mờ ngan ngồn là tiah dong kờl nàng ală rơndăp broă lơh, bồ tơngoh kơlôi sơnơng bơcri priă in gơ gơs ngan ngồn, nàng ală cau bơcri priă in brồ guh gơ gơs ală mpồl lơh sa kă bro lam lài tàm gah broă lơh bơh he dê”.

Tus bal mờ đơng lam pơrjum, Phó Thủ tướng Cíñ phủ ồng Hồ Quốc Dũng jờng rơ uă ală lơh ngan bơh càr Gia Lai dê; cồng nha tàm pơrjum neh pà gŏ bơta pin dờn bơh mpồl bơtiàn cau bơcri priă tàm gùng dà pơlam bơtàu tơnguh càr dê. Phó Thủ tướng sồr càr gơ hòi gơ jà bơcri priă geh sac rơwah jat jơnau pal jat “3 ờ” (ờ tàm pơ gơl tiah ơm kis nàng ai gơguh lơh sa, ờ dờp rơndăp broă lơh sồr pal ngui uă dà kơl hề cau lơh broă ir halà măi mok neh yau, ờ rơwah cau bơcri priă ờ tơl bơta pràn jak) mờ ai lơh lài ală rơndăp broă lơh FDI rài pa bè AI, ƀán zẫn. Mờ Phó Thủ tướng kung sồr càr Gia Lai pal sền lơh sa cau dồ nă is là bơta gơn kơnờm kwơ màng ngan rlau jơh, lơh pràn tam gơl pa sră pơ àr gơnoar atbồ ngan ngồn jat gùng dà “bơceh lơh, drơng broă”, nàng ai bơta niam nùs bơh mpồl lơh sa kă bro dê lơh bơta đo was mờ jơnau hơ sùm lòt bal, tă bơsong di tŭ ală kal ke ai cau bơcri priă in: “Bơsram lơh jat uă ngan nùs nhơm bơtàu tơnguh lơh sa cau dồ nă să is gơ gơs dùl bơta gơn kơnờm kwơ màng ngan rlau jơh bơh rài lơh sa dê. Lơh geh ală bơta ƀuơn nàng mpồl lơh sa kă bro cau dồ nă să is bơtàu tơnguh jơh bal broă lơh mờ bè cồng nha; pơn jờng lơh geh ală mpồl lơh sa kă bro geh bơta pràn jak tàm pơr lòng bal uă, mơkung sơlơ tơnguh lơh bal đah mpồl lơh sa kă bro tàm lơgar mờ mpồl lơh sa kă bro FDI, hời rơ hời tus bal jrô tàm ală bơta kwơ lơh sa mờ tăc phan gùt plai ù. Là bol he pal đơs ngan, pal lơh ngan, lơh tus gùng tus dà, lơh ai geh cồng nha nàng lam càr Gia Lai bol he dê bơtàu tơnguh tam gơl pràn tàm tơngai tus”.

Mờ ală jơnau hơ pràn kơl dang bơh gơnoar atbồ bal mờ bơta pin dờn mờ bơta lòt bal bơh mpồl lơh sa kă bro dê, Pơrjum hòi jà bơcri priă nam 2026 ờ mìng cèng rê âlw khà sồ niam ngan ai càr Gia Lai in lơm mờ gam pờ geh bơta kơ̆p gơn bè dùl tŭ tơngai bơtàu tơnguh tam gơl pràn, kơnhăp kơ̆. Bơh bơnàng jă hơ̆, Gia Lai gam hời rơ hời đơs nền gơnoar broă là tiah tus gơ kờñ ngan bơh mpồl priă bơcri, wèt tus jơnau kờñ gơguh lơh sa mhar, geh cồng nha mờ mut gơ rờm bal jrô tàm ală bơta kwơ gùt plai ù tàm tơngai tus.