Mờ tơngume “Gia Lai- Brê bơnơm dờng ơning ơnàng geh bal dà lềng tơlir”, Nam Lòt nhơl Dà lơgar 2026 cèng jơnau yal bè bơta tàm tơrbŏ bal đah ù tiah brê bơnơm dờng ơning ơnàng Tây Nguyên mờ tiah kềng gah dà lềng, đah ù tiah brê bơnơm dờng mờ bơhiàn niam chài is ngan bơh ală jơi bơtiàn dê. Do là dơ̆ nàng Gia Lai in yal tơngĭt mờ dunia ală bơta kwơ niam chài ù tiah brê bơnơm mờ kòn bơnus is ồn bơh ù tiah Tây Nguyên dê.

Tàm nam 2026 kờp dŭ rơ̆p geh 244 broă lơh, broă niam chài, lòt nhơl mờ tàp pràn să jan geh bơyai lơh sùm tàm Gia Lai mờ uă tiah tàm gùt lơgar. Bơta tờm là Dơ̆ sơnđờm mut lơh Nam Lòt nhơl Dà lơgar- Gia Lai 2026, kờp dŭ geh bơyai lơh tàm mang ngai 28/3 tàm sơnah ƀòn Quy Nhơn. Tàm tơngleh dơ̆ sơnđờm mut lơh, càr Gia Lai rơ̆p bơyai lơh pơrjum hòi jà bơcri priă nam 2026, kờp dŭ jàu Jơnau lơh nền gùng dà broă lơh bơcri priă mờ kĭ hơ lơh broă bal ai uă rơndăp broă lơh gơwèt ală gah lơh sa mờ măi mok, năng lượng, phan bơna bơt bơtàu, kă bro phan- drơng broă mờ lòt nhơl. Bơdìh hơ̆, uă broă lơh sền gĭt lời ai năc lòt nhơl kung geh bơyai lơh bè: broă lơh yal tơngĭt uă kơphê pơgồp bal mờ lòt nhơl broă lơh sa suơn sre; yal tơngĭt bơta niam bơkah phan sa ƀòn lơgar; ală dơ̆ tàm pơrlòng tàp pràn să jan bal mờ uă broă lơh niam chài is ồn.