Ngai 24/09, Tỉñ ủy càr Gia Lai bơyai lơh Pơrjum tàm jàu broă lơh đah Duh broă sùm Tỉñ ủy càr mờ duh broă sùm Anih duh broă đơng lam Đảng 135 sàh, sơnah ƀòn nàng kờñ sền swì cồng nha lơh broă bơh broă lơh tơrlòng lài gơnoar ătbồ ƀòn lơgar 2 kâp tơnơ̆ mờr 3 nhai lam lơh. Jăt jơnau yal tàm pơrjum, ală anih lơh broă Đảng, gơnoar ătbồ, mặt trận dà lơgar mờ mpồl cau tàm kâp hơđơm lơh broă gơlòt sùm, geh cồng nha. Anih tờm drơng broă sră pơ àr gơnoar ătbồ dà lơgar kâp sàh lơh geh niam jơnau kờñ dong kờl làng bol mờ mpồl lơh sa kă bro. Jơh gùt càr neh dờp rlau mờr 300 rbô sră nggal, tàm hơ̆ rlau 90% bơsong di mờ lài mờ tơngai pơrgon.

Tàm pơrjum, uă jơnau đơs sồr càr sền gròi ai priă tă lơh pa anih lơh broă sàh, sơnah ƀòn tơnơ̆ tơmŭt bal; dong kờl blơi măy mŏk phan ngui măy mŏk yal tơnggĭt jơnau, bơtơl cau lơh broă sa priă nhai tàm ală broă gam ờ tơl. Ală ƀòn lơgar kung geh jơnau dan bơcri priă phan bơna gùng lòt, bơtơ̆t tơnau dơng dà drơng ngui sa mờ lơh broă sa, hìu bơsram, hìu sơnơm, hìu niam chài. Jăt Ƀí thư Tỉñ ủy càr Gia Lai ồng Hồ Quốc Dũng, ală sàh, sơnah ƀòn pal pơn jăt tai pồ tơl mpồl kwang bàng, bơtơl kwang bàng, geh broă lơh lơh broă loh làng, jơh nùs kràñ cê lơh jăt ală broă jàu bơtàu tơngguh, pơn jăt bal mờ lơh broă tơrmù rƀah, gàr niam rài kis mpồl bơtiàn. Ồng Hồ Quốc Dũng đơs sùm, nàng tơngguh rlau tai cồng nha lơh broă, pơn jăt tai lơh pràn tam pà kâp, jàu gơnoar ai ală sàh in.