Ồng Phạm Anh Tuấn, Củ tịc Anih duh broă Làng bol càr Gia Lai đơs nền, Sờh broă dơlam is càr neh lam lơh kờp sền ƀằng bơsram bơh ală kwang bàng gơtìp đơs là ờ pràn jak halà ờ gơtùi lơh jat jơnau sồr kơnòl broă. Cồng nha ai gŏ, 100% kwang bàng, cau lơh broă sa priă nhai kâp sàh, sơnah ƀòn tŭ do ndrờm geh ƀằng bơh kao đẳng, đại họk rlau hơđang, geh bơto bơtê wil tơl. Tŭ do, càr Gia Lai neh lam lơh tam pà kâp pràn ngan mờ tơng gơs mpồl đơng lam sàh, sơnah ƀòn bè “dùl càr tơrgùm dềt”. Củ tịc Anih duh broă Làng bol càr đơs sùm jơnau sồr “tơnguh mhar lơh broă, tơnguh bơta pràn lơh broă, lơh tus jơh broă ờ di kờp tŭ jơ lơh broă halà ngai rlô”.

Bè broă lơh, Anih duh broă Làng bol càr Gia Lai neh lơh mpồl jat sền cồng nha lơh broă (KPI) mờ khà sền sơ wì mùl màl ờ hềt geh bơh lài tus tŭ do. Ală broă jàu bè lơh sa – mpồl bơtiàn neh jàu tus tơl sàh, sơnah ƀòn, tơl gah broă, tơl bơta chi tam, phan ròng, gơ jat bal mờ jơnau đơs lài mờ jơnau pơlam ngan ngồn. Tàm nhai 12 nam 2025, càr rơp jà Ƀí thư mờ Củ tịc ală sàh, sơnah ƀòn yal bè Jơnau rơcang đơng lam nàng đơng lam càr bal mờ ală sờh, gah broă lơh in tă pơgồp jơnau đơs, lơh sir lài mờ tŭ lam lơh jat. Dilah ală sàh, sơnah ƀòn ờ lơh gơtùi ală broă jàu, càr mìng gam broă là ala kwang bàng.