Jat broă rơndap lơh, Anih duh broă Làng bol càr Gia Lai rơp kràñ cê tă sờr jơh ală broă lơh sơ gràm tiah kềng gah bơtơt kìng dà mờ tàm dà dờng lơh gơ kòl hiòng dà hòr, mờ kung pơgồp bal bơnĕ bơnài đah broă lơh lam lơh bơt bơtàu mờ ờ bơt bơtàu nàng gàr niam bơta pràn tuh tơlik dà tih dà lìu bơh dà dờng Hà Thanh dê. 

Tàm nam 2026, càr ai lài rlau 280 tơmàn đông nàng bơsong ală kơnòl broă jal mhar, tơrgùm tă bơsong ală bơta gơ kòl hiòng dà hòr lài mờ nhai mìu dà tih dà lìu. Broă tờm là ntrờn 75 hìu bơnhă làng bol lơh tìs tiah kềng bơ tơt kìng dà tàm sàh Tuy Phước mờ sơnah ƀòn Quy Nhơn Bắc. Tơngai bơh nam 2027 tus nam 2030, càr kờp dŭ tă rlau 2 rbô 395 tơmàn đong nàng lơh sir ală bơnah broă jat rơndap ù tiah, wèt tus gàr niam kơ̆ kơljap jŏ jòng mờ bơtàu tơnguh kơnhăp kơ̆ ai tiah đah đơm in. Anih duh broă Làng bol càr Jàu Sờh Broă lơh sa suơn sre mờ Tiah ơm kis đơng lam, pơgồp bal mờ ală mpồl geh gơ rềng lơh gơs broă rơndap lơh mùl màl lài mờ ngai 06/3 tus do nàng sơn đờm lam lơh mơ tơn.