Do là cồng nha pơn rơ ngan tàm broă tam gơl wơl sră pơ àr gơnoar atbồ càr dê, geh đơs tàm pơrjum ƀău bơh Anih duh broă Làng bol càr Gia Lai bơyai lơh. Nam 2025, càr neh kờp sền jơh ală sră pơ àr gơnoar atbồ, tơrmù rlau nggùl tŭ tơngai bơsong broă, sơrlèt rlau jơnau kờñ mờ Cíñ phủ jàu. Pal sền gròi là tŭ tơngai lam lơh ală sră pơ àr gơ rềng tus bơcri priă, bơt bơtàu, tiah ơm kis geh tơrmù lơyah pràn ngan; gơ wèt mờ rơndap broă lơh bơdìh tiah lơh sa mờ măi mok gơmù gam mờr 60 ngai, tàm tiah lơh sa gam 38 ngai. Tơngai lơh sră dan kă bro geh tơrmù lơyah bơh 3 ngai gơmù mìng gam 3 jơ. Gia Lai kung là càr lam lơh 100% sră pơ àr gơnoar atbồ ờ gơ wèt tàm nhàr ù tiah; mờ kung lơh pràn tam pà kâp, jàu gơnoar mờ ai tơlik gùng dà broă lơh ờ sa, tơrmù priă tă gơ wèt mờ sră pơ àr lơh tàm internet. Kơnờm bơh hơ̆, khà sră pơ àr tong tàm internet geh rlau 95%, sră nggal bơsong di tŭ tơngai hơ pơrgon geh mờr 98%. Mờ ală cồng nha do, khà sồ sơñio drơng broă làng bol mờ mpồl lơh sa kă bro in bơh càr Gia Lai dê ơm dơ̆ 2 tàm gùt lơgar, gơ wèt mpồl ală càr geh bơta niam drơng broă niam ngan.