Ală ngai bồ nhai 4, tàm anih lam lơh bơnah broă crăp lơh sồ 2 gơ wèt Rơndap broă lơh dềt sồ 2 Gùng rơndeh lòt mhar Khánh Hòa – Buôn Ma Thuột, nùs nhơm lam lơh geh lơh jal mhar ngan. Tơl mpồl cau lơh phan, cau chài bơceh lơh bal mờ dồ ròt măi mok, phan bơna bơh Kông ty pơgồp bal bơcri priă mờ Bơt bơtàu gùng lòt Phương Thành gam jal mhar tuh bê tông jrong, trồm rơbàng mờ lă cài bàr đah 2 rbàng. Bi Đỗ Đình Huấn, cau măi rơndeh chŏ tơnring ù pà git, tàm tŭ tơngai giă xăng zờu gơguh jơnhua, broă ngui măi mok geh sồr pal lơh nền nòn, dipal rlau nàng kờñ tềm pềr priă tă mờ gàr tŭ tơngai hơ pơrgon lam lơh:

“Oh mi rơcang lài tềm pềr tŭ ngui măi mok den he măi di ga, tơnguh, tơrmù phan chŏ ring, ờ măi ndang nisơna. Tŭ ntrờn lòt den kung lòt rơlĕ, gàr ga ring sùm, pleh tơnguh ga den rơp hoàc uă xăng zờu rlau. Ală tŭ kơp rơndeh lòt halà ơm rlô den ndrờm gơ sơt măi nàng tềm pềr zờu”.

Jat ồng Lương Công Lý, Kwang lam bồ đơng lam broă lam lơh bơnah broă crăp lơh sồ 2 pà git, giă zờu gơguh jơnhua mờ khà tac kung ờ huan geh sơl neh lơh priă ngui măi mok gơguh uă ngan, mờ kung gơ dŏ bal giă ală bơta phan bè lòs, sơmang, bràs, lŭ gơguh tus 20%. Tềng đap bơta geh ngan do, mpồl neh rơcang lài đơng lam ngac ngar khà zờu diesel mờ tam gơl broă rơndap lơh lam lơh, nàng gàr tơl xăng zờu mờ gàr tŭ tơngai hơ pơrgon lam lơh rơndap broă:

“Khà xăng zờu mờ phan bơt bơtàu gơguh giă jơnhua ngan mờ ờ huan geh tai, bol he pal rơcang lài jòi tai ală mpồl tac nàng gàr broă lam lơh. Bal mờ hơ̆, mpồl kung sền sơ wì, khòm tơrgùm mờ ai lài lam lơh ală bơnah broă tờm bè lơh tap base (hơ̆ là cài gùng), CTB mờ lă cài tàm ală gơl gùng tờm kuơmàng”.

Nùs nhơm lam lơh jal mhar kung gam geh lơh tàm bơnah broă crăp lơh sồ 3, gơ wèt rơndap broă lơh dềt sồ 2 gùng rơndeh lòt mhar Khánh Hòa – Buôn Ma Thuột. Bơnah broă geh kờp jơh priă tă lơh mờr 1 rbô tơmàn đong, geh 2 nơm gùng trồm, rbàng ƀă gan gùng mờ mờ 2,5 kơi sồ gùng. Ồng Trịnh Trung Lượng, đơng lam bơnah broă crăp lơh sồ 3 pà git, mờr 1 nhai do, giă zờu gơguh jơnhua, mpồl tac zờu geh tŭ ờ huan geh lơh mpồl lơh sa kă bro gơtìp uă kal ke. Bulah bè hơ̆, mpồl kung gam gàr sùm 250 nă cau lơh phan, cau chài bơceh lơh bal mờ 100 nơm măi mok, phan bơna nàng gàr tŭ tơngai hơ pơrgon lơh rơndap broă.

Tŭ do gam tàm tơngai prang duh ngan, trồ tiah ƀuơn ngan nàng lơh rơndap broă den tàng pah ngai mpồl kờñ geh mờr 4 rbô lít zờu diesel nàng ngui măi mok. Bè hơ̆ den tàng jat ồng Lượng, broă gàr tơl xăng zờu kơ̆ kơljap sùm là jơnau mờ mpồl gam lơh ngan tơrgùm bơsong:

“Giă zờu gơguh jơnhua mờ gam ờ geh mpồl tac tai lơh bol hi pal rơcang nền nòn ngan. Bol hi neh rơcang lài lơh broă mờ ală mpồl tac phan nàng dan blơi phan gờñ, blơi uă nàng ơn prap. Tŭ do bol hi gam ơn prap 3 sơntèk dờng bơh 15 rbô tus 20 rbô lít zờu diesel mờ gơtùi ngui nàng lơh broă bơh 1 tus 1 nhai mờ nggùl”.

Sơn đờm lam lơh bơh nhai 6 nam 2023 mờ kờp jơh priă bơcri lơh mờr 22 rbô tơmàn đong, gùng rơndeh lòt mhar Khánh Hòa – Buôn Ma Thuột geh kơp kơnờm lơh gơlik bơta chồl tơnguh ai tàm tơrbŏ bal tiah Tây Nguyên mờ tiah kềng gah dà lềng đah jum tàm gùl lơgar. Tàm tŭ tơngai giă xăng zờu gơguh jơnhua, ală cau tờm lơh rơndap broă neh rơcang lài lam lơh uă broă lơh ngac ngar nàng gàr niam tŭ tơngai hơ pơrgon jat jơnau sồr lơh bơh Thủ tướng Cíñ phủ dê.