Tàm ală ngai trồ duh rơ ồl lồi nhai 6, tàm tiah tam tàu thôn Thanh Minh, sàh Suối Trai, càr Dăk Lăk rlau 2 lồ tàu bơh ồng Ale Văn Đăng dê, 77 sơnam neh koh tơnhàu rlau 1 poh mơya kung gam ìs hờ bơdìh trồ tơngai, gơhuc khà kơn jơ̆ pah ngai. Tơnơ̆ rlau 1 poh koh tơnhàu, khà tàu neh ro rlau 1/3. Ồng Ale Văn Đăng rơngòt:

“Koh neh 10 ngai rau mơya ờ geh rơndeh mut pơndiang sơl. Hòi điện thoại den khi đơs là ờ geh rơndeh, hìu măi gơtìp ờ diơng. Añ kung ờ git lơh bè lơi. Kòn añ dê hòi điện thoại git nđờ dơ̆ tơn, kòn añ dê kung hòi điện thoại sàh in sơl. Tŭ do tàu neh ro jơh, ờ gam bơta lơi tai”.

Jat kềng gah Gùng dà lơgar 19C gơl lòt gan ală sàh Suối Trai, Sơn Hòa, Vân Hòa… ờ kal ke nàng sền gŏ ală ƀlàng tam tàu neh koh tơnhàu ìs bè rơhe. Tàm uă ƀlàng tam tàu ndai, tờm tàu neh rlau tơngai koh tơnhàu 3 nhai mơya kung gam ìs ro tàm ƀlàng tam, ờ git tus tŭ lơi den ờ sồng geh yal tơngai koh tơnhàu. Cau tam tàu pà git, ờ hềt tŭ lơi cau tam tàu gơtìp kal ke bè nam do:

“Dilah he koh den gơ ro jơh, kung bè he chàng sơl. Tŭ do ìs sùm bè hơ̆, ờ git tus tŭ lơi den hơ̆ sồng koh, làng bol git đơs mờ cau lơi”.

Bơta geh ngan do kung là bơta ndrờm bal bơh uă ngan cau tam tàu tàm ală tiah tam tàu đah mat tơngai lik càr Dăk Lăk dê. Khà tơrgùm kờp ờ hềt wil tơl, tus lồi nhai 6, mìng is tàm tiah tam tàu kơnhoàl Sơn Hòa yau… gam rlau 6 rbô lồ tàu ờ hềt geh koh, geh bơh 10 tus 12% bă tàu, gơ wèt jat tơl sàh. Pơn yơu bè sàh Sơn Hòa, do là tiah geh bă ù tam tàu uă ngan càr Dăk Lăk dê mờ rlau 8 rbô lồ tus tŭ do neh koh geh rlau 7 rbô 100 lồ, kung gam mờr 950 lồ ờ hềt tơnhàu. Sàh kung neh lơh broă mờ hìu măi sơdàng KCP tơn jŏ kàl păt tàu mờ blơi jơh tàu làng bol lơh broă sa in. Ồng Nguyễn Duy Tình - Phó Chủ itjch Anih duh broă Làng bol sàh Sơn Hòa, càr Dăk Lăk pà git:

“Tềng đap bơta geh ngan do, Anih duh broă Làng bol sàh neh lơh broă tơn mờ Mpồl lam bồ Kông ty hìu măi sơdàng KCP nàng lơh bè lơi bơh tŭ do tus lồi nhai 7 do rơp koh tơnhàu jơh tàu làng bol lơh broă sa in nàng pleh gơbàn hoàc huơr. Tŭ koh lơyài den rơp lơh gơmù cồng nha lơh geh ai kàl tơnơ̆ in”.

Kàl tam tàu nam do, cau tam tàu càr Dăk Lăk pal kong mờ dùl ròt ală kal ke bè: mìu dàh tih dà lìu lơh gơbàn hoàc huơr tàm nggùl kàl; giă tàu gơmù tài sơdàng tac lơyài gơ rềng bơh bơta blơi tìs adat boh lam sơdàng bơh lơgar ndai; trồ tơngai duh, soat dà jŏ jòng lơh rlau 1 rbô lồ gơtìp ồs sa mờ tus lồi kàl den git nđờ rbô lồ tàu kung gam ơm kơp geh koh tàm ƀlàng tam… tàm tŭ cau koh tàu den ờ geh mờ priă ơpah gơguh pah ngai, bơh 28 tus 30 tơlak đong ai 100 tấn tàu… Dùl kàl tam tàu ờ lơngồt gơ wèt mờ cau tam tài tàm tiah đah mat tơngai lik càr Dăk Lăk.