Tơnơ̆ mờ tŭ tơmŭt bal mờ càr Dăk Nông mờ Bình Thuận, càr Lâm Đồng pa gơs bơta pràn bơtàu tơnguh pơgồp bal tiah bơnơm – tiah rềp bal đah bơnơm mờ tiah ring – tiah ring jăt gah dà lềng, mờ bă ù ơnàng rơlao 24 rơbô kơi sồ vuông, ơnàng ngan gùt lơgar dê. Bơta dờng ơnàng do tơrgùm tơl bơta niam bal mờ bơta geh dờng bè ù tiah, phan geh is siñ họk, năng lượng lơh geh wơl, lơh sa brê, lơh sa dà lềng mờ lơh sa suơn sre ngui măi mok pa. Tàm broă bơtàu tơnguh pa, Dơng bơnơm Di Linh at gơnoar broă tờm kwơ màng, geh dờng ơnàng bơh koèl kơh Bảo Lộc tus jơng koèl kơh Prenn, tơrbŏ ală tiah pràn càr dê.

Ồng Bùi Hoàng Phương, Thứ trưởng Ƀộ Bơta chài mờ Măi mok đơs là, gùng dà bơtàu tơnguh pa neh ai Bơnơm Di Linh mŭt tàm gơnoar broă đah gơguh lơh pa sa, tiah tờm tơrbŏ bal: “Bơnơm Di Linh geh tàm ù tiah kwơ màng pơgồp bal đah Tiah Tây Nguyên mờ tiah Jăt gah dà lềng đah Jum tàm gùl lơgar mìng ngài mờ ƀòn dờng Hồ Chí Minh di pơgăp 200 kơi sồ tơrbŏ bal ƀuơn bơh gùng rơndeh lòt mhar Dầu Giây mờ Liang Khàng bal mờ 2 ƀlàng rơndeh, ƀlàng rơndeh par Liang Khàng mờ tơnơ̆ do là ƀlàng rơndeh par Phan Thiết dong kờl ai Di Linh in ƀuơn tàm broă tus mờ tiah tờm lơh sa dờng tàm lơgar. Mờ bơta ngài pơgăp 2, 3 jơ par Di Linh he dê gơtùi geh tus mờ ală càr lơgar mờ ală tiah drà dờng tàm câu Á dê”.

Tàm bơta ñhoa pơgăp 100 thơ̆k pơn drờm mờ măt dà lềng, Bơnơm Di Linh ngui geh nhơm trồ tiah niam gùt nam mờ bơta duh bè ờs 22,2 độ C, khà mìu geh uă, ù bazan uă bơta niam. Tiah do geh dòr tơlir niam bơh tờm kơphe, ce, jơu ròng tu mờ tờm chi sa plai dê… mờ priă geh tàm dùl bă ù gơguh uă sùm kơnờm bơh broă lơh sa suơn sre ngăc ngar, lơh sa suơn sre gơlòt bal, hữu kơ. Bal mờ pang rùp geh brê bơnơm dà lềng dờng ơnàng niam, Dơng bơnơm Di Linh neh geh tŭ là tiah tờm rài lài do – sră pơ-àr tàm tơngai crơng gơs càr Đồng Nai Thượng mờ càr Lâm Đồng dê.

Ồng Nguyễn Anh Dũng, Phó Vụ atbồ Vụ Bơto bơtê Đại họk, gơwèt Ƀộ Bơto bơtê mờ Bơsram đơs là, di lah geh ai gùng dà broă lơh gơdờp, tiah do gơtùi gơs tiah tơrlòng lơh ală broă bơto bơtê pơgồp bal mờ tam gơl pa bơceh lơh: “Di Linh gam geh uă ngan ù tiah nàng bơtàu tơnguh mờ ờ hềt geh lơh tài ală broă lơh lài do dê, den tàng do là bơta lài niam ngan nàng bơtàu tơnguh tàm tơngai tus. Gơwèt mờ broă bơto bơtê mờ bơsram kung pal geh broă lơh pràn, tàm hơ̆ Dà lơgar lơh gơnoar bơceh lơh, gam cau lơh sa kă bro den rơ̆p ờ mìng lơh bè ờs là lơh bè mpồl lơh sa kă bro mờ tsu tơn pơgồp bal bè bơta ngăc ngar mờ tam gơl pa bơceh lơh”.

Nam 2025, broă lơh sa càr Lâm Đồng dê geh rơlao 300 rơbô tơmàn đong. Lơh sa tam gơl niam, tơrmù rơhời broă lơh sa suơn sre bè ờs, tơnguh mhar lơh sa mờ măi mok – bơ̆t bơtàu mờ broă lơh drơng ala… Mơya, nàng lơh geh jơnau kờñ gơguh lơh sa bàr sồ tàm nam 2026, càr Lâm Đồng ai pal tam gơl mhar tus mờ broă gơguh lơh sa ai bơh tàm bơta chài măi mok, tam gơl pa bơceh lơh, lơh sa tơlir mờ lơh sa sồ. Bơh tàm bơta pràn ù tiah geh is niam, bơta niam chài bal mờ nùs nhơm kơ̆p kờñ tam gơl pa, Bơnơm Di Linh gam geh càr Lâm Đồng ai nàng bơtàu tơnguh tàm bơta uă pa.

Ồng Hồ Văn Mười, Kwang geh jơng Đảng Dà lơgar, Củ tịc Anih duh broă Làng bol càr Lâm Đồng đơs bè broă rơcang lơh broă bal mờ càr dê nàng bơ̆t bơtàu Bơnơm Di Linh gơs tiah tơrgùm bal mờ ală bơta kwơ bè lơh sa suơn sre, brê bơnơm niam, năng lượng mờ bơta chài măi mok tàm broă bơtàu tơnguh tơrgùm bal càr Lâm Đồng dê: “Nàng ai tơl bơta niam ngan ai ală mpồl lơh sa kă bro tus mờ Bơnơm Di Linh pal lơh broă rơndăp ù tiah tơrgùm bal càr Lâm Đồng dê di pal. Geh bè hơ̆, mpồl lơh sa kă bro hơ̆ sồng tus. Kwang đơng lam càr Lâm Đồng sùm jơh nùs mờ ai mpồl lơh sa kă bro là dùl tàm bơta tờm nàng bơtàu tơnguh. Bol añ ai broă bơtàu tơnguh nàng kơl jăp mờ ai bơta kơl jăp nàng bơtàu tơnguh”.

Tàm broă lơh kwơ màng bơtàu tơnguh tàm tơngai pa, càr Lâm Đồng ai jơnau kờñ bơ̆t bơtàu Bơnơm Di Linh gơs tiah tờm kơlôi sơnơng, ngui mờ lơh geh uă măi mok tàm gah lơh sa suơn sre ngui măi mok pa, măi mok siñ học, lơh gơs phan nền nòn mờ năng lượng lơh geh wơl. Bơtàu tơnguh lơh sa lòt bal mờ sền gàr tiah kis, gàr niam rài kis broă lơh broă sa mờ ndrờm bal mpồl bơtiàn. Bơh bơta kwơ ù tiah geh is bal mờ bơta niam chài geh uă, bă ù tiah do gam kơ̆p kờñ lơh geh pràn, gơs tiah tờm gơguh lơh sa mờ rùp rài ai broă bơtàu tơnguh ai bơh tàm bơta ngăc ngar, tam gơl pa bơceh lơh dê.