Oh Siu Thúy, bơsram ơdŭ 6A, Hìu bơsram Kấp dùl mờ Kấp bàr Chư Đăng Ya, sàh Biển Hồ, càr Gia Lai (sàh Chư Đăng Ya, kơnhoàl Chư Păh lài do) pa lơh gơs jơnau sền dar bơsram dơ̆ dùl. Oh Thúy pà git, 5 nam tơn tŭ bơsram kấp dùl oh ndrờm geh cồng nha jăk ngan, den tàng ờ gơtìp bơta kal ke lơi tàm dơ̆ sền dar bơsram do. Mờ tàm hơ̆ tai, tàm broă ơm sa ngai tơn tàm hìu bơsram, geh ală cau pơgru jơh nùs bơto, den tàng oh Thúy sơlơ pin dờn tàm broă bơsram sră, mờ lơh ngan bơsram jăk: “Pơgru tàm hìu bơsram jơh nùs ngan tàm broă bơto sră mờ sền gròi tus mờ bol oh. Bol oh lơh ngan bơsram sră jăk rơlao, nàng bañ gơtìp lơh geh jơnau ờ niam tus mờ mè bèp mờ ală cau pơgru dê”.

Bal mờ broă lơh niam wơl jơh tơl ală bơta bè phan bơna tàm hìu bơsram-ơdŭ bơsram, bơta niam broă bơto sră tàm tiah làng bol jơi bơtiàn ờ gal cau càr Gia Lai dê geh gơguh loh làng ngan. Oh Rmah H’ Ý, bơsram ơdŭ 5B, Hìu bơsram kấp dùl mờ Kấp bàr Chư Đăng Ya pà git, neh sùm dờp geh broă bơto bơh cau pơgru, hìu bơsram dê tàm broă bơsram sră. Ờ mìng mblàng jơnau bơto ƀuơn wă, jơh nùs bơto sră, cau pơgru gam sùm sền gròi, jòi sền nàng git rài kis hìu nhă nàng geh jơnau pơn dờm pơn-iang, dong kờl di tŭ. Bơh tŭ hơ̆, dong kờl oh bơsram sră ngai sơlơ gơguh jăk. “Pơgru sùm sền gròi tus mờ bol oh, sùm kờñ bal mờ bol oh. Tŭ bol oh gơtìp kal ke den pơgru rơ̆p dong kờl. Kơnờm mờ hơ̆, cồng nha bơsram sră bơh bol oh dê gơguh jăk rơlao uă ngan. Jơnau kơ̆p kờñ oh dê là gơs cau lơh Kwang àng tơnơ̆ do”.

Jăt mò Rmah H’ Ngát tàm ƀòn Xoá, sàh Biển Hồ, càr Gia Lai pà git, bơta niam broă bơto mờ bơsram tàm ƀòn ờ mìng geh gơguh niam tài kơnờm bơh ală hìu bơsram geh lơh gơs niam mờ cau pơgru kờñ gơboh mờ broă bơto. Bơta niam broă bơto sră geh gơguh bơh tŭ geh ală jơnau sền gròi bơh Đảng, Dà lơgar, dong kờl ală kơnòm dềt in bè priă bơsram, priă tă tàm rài kis, pà phe sa, phan bơsram…

Kơnờm bơh ală broă dong kờl do, ală hìu nhă neh tơmù ƀà kal ke, kơnòm dềt geh tơl niam nàng lòt bơsram niam rơlao. Mò Rmah H’ Ngát pà git: “Ưn ngài Đảng, Dà lơgar neh geh ală broă dong kờl ai oh kòn bol añ in geh tơl bơta nàng lòt bơsram, geh bơsram sră niam rơlao. Oh kòn bol añ bơsram sră ngai sơlơ gơguh jăk rơlao, bol añ chờ hờp ngan”.

Ồng Nguyễn Chiến Thắng, Lam bồ Hìu bơsram Kấp dùl mờ Kấp bàr Chư Đăng Ya pà git, hìu bơsram geh 90% kơnòm bơsram là làng bol jơi bơtiàn ờ gal cau, mìng là kòn cau Jrai. Ală broă dong kờl bơh Dà lơgar ai kơnòm bơsram bal mờ cau pơgru in tàm tiah ngài neh dong kờl bơta niam tàm broă bơto mờ bơsram bơh hìu bơsram dê ngai sơlơ gơguh niam: “Tài bơh broă sền gròi bal mờ broă dong kờl bơh Đảng, Dà lơgar bè do, bơh jơnau git wă bơh ală cau mè bèp kơnòm bơsram mờ tus kơnòm bơsram den ai bơh nam tơnơ̆ là uă rơlao mờ nam lài. Làng bol iang nùs ai kòn lòt bơsram, tàm hơ̆ uă ngan cau mè bèp neh geh broă sền gròi, bŭ lah gơtìp kal ke bè lơi kung ai oh kòn in lòt bơsram tơl. Hìu bơsram kung kung pin dờn, geh bơta niam bè do, dùl tơngai tai bơta ngăc ngar tàm làng bol rơ̆p gơguh rơlao, rơ̆p niam rơlao uă ngan”.

Jăt ồng Nguyễn Đăng Quang, Củ tịc Anih duh broă Làng bol sàh Gào, do là sàh geh rơlao nggùl khà kờp làng bol là jơi bơtiàn ờ gal cau, geh cồng nha bơh ală broă dong kờl bơto bơtê mờ bơsram gơwèt tàm tiah làng bol jơi bơtiàn ờ gal cau tàm uă nam neh gơguh bơta ngăc ngar làng bol. Bơh tŭ hơ̆, broă ngui bơta chài măi mok tàm broă lơh sa ngai sơlơ geh cồng nha, rài kis làng bol geh gơguh loh làng ngan. Is ồn, khà oh kòn tàm ală ƀòn mŭt bơsram đại họk, cao đẳng ha là lòt bơsram broă lơh ngai sơlơ uă. Bơh tŭ hơ̆, ai geh mpồl cau lơh broă geh bơta ngăc ngar uă, drơng broă bơtàu tơnguh lơh sa mpồl bơtiàn sàh in. “Broă sền gròi tus mờ bơto bơtê mờ bơsram Đảng, Dà lơgar dê là di ngan, tàm hơ̆ uă ngan là tàm tiah ngài. Bơta ngăc ngar den ngai sơlơ gơguh uă, ală oh kòn mu]t bơsram đại họk uă ngan. Bè đah sàh dê den bol añ bơ̆t bơtàu mpồl kwang bàng lơh broă tàm do tơn, dờp ală oh kòn neh jơh bơsram đại họk rê nàng bơ̆t bơtàu mpồl kwang bàng pơn jăt tai sàh in”.

Ală broă dong kờl di neh ai geh broă tam gơl pràn kơl dang ai broă bơto bơtê mờ bơsram tàm tiah làng bol jơi bơtiàn ờ gal cau tàm càr Gia Lai đơs is, gùt lơgar đơs bal. Kơnòm bơsram geh tơl bơta niam nàng lòt bơsram, cau pơgru iang nùs mờ broă bơto sră, phan bơna ngai sơlơ geh lơh gơs. Kơnờm mờ hơ̆, bơta niam broă bơto mờ bơsram geh gơguh loh làng ngan, bơta ngăc ngar tàm làng bol gơguh iăt nam. Do là tơngu me tờm kwơ màng nàng bơ̆t bơtàu mpồl cau lơh broă tơn tàm tiah do dê, pơgồp bal lơh pràn broă bơtàu tơnguh kơ̆ kơl jăp tiah ngài, tiah làng bol jơi bơtiàn ờ gal cau in.