Gơl gùng Dà lơgar 27 lòt gan thôn Phi Jút, sàh Dà Rsal yau, tŭ do là sàh Dam Rông 3, càr Lâm Đồng jòng rlau 1 kơi sồ bềng tơn ală kơlhŭc dờng gơtìp dà bam. Rơndeh kong goa, rơndeh pơndiang nac, rơndeh oto dềt mờ jơh bal rơndeh măi pal rơlĕ rơlùn lòt gan ală tiah gơ ngơr jrô tàm dà bŏ lơm bè. Bi Phan Mười, dùl nă cau geh hìu tềng mat gùng tàm do pà git, bơta ờ diơng bè do neh jŏ jòng 3 – 4 nam do, lơh gơbàn uă ngan kal ke tus broă lòt rê, jun pơndiang phan, nac mờ kung pơhìn roh bơta lơngăp lơngai lòt rê: “Nhai mìu den ờ jai kong ngan, dà bŏ bè sre tơn. Rơndeh lòt gan gơ đăt jơh ù bŏ tềng kơlik hìu, ai nhai prang den añ sùm pal til mpồng, rài kis ờ ƀuơn dồ êt lơi. Geh uă dơ̆ gơ pừ rơndeh, geh tŭ geh cau chơt tềng nđăp hìu añ tơn. Kung kơp kờñ anih lơh broă geh gơnoar mhar lơh niam wơl gơl gùng do ai làng bol in lòt rê ƀuơn ƀuài, ală sau kơnòm bơsram lòt bơsram geh lơngăp lơngai, niam ờdo ờdă”.

Bi Bùi Tuấn Anh, cau măi rơndeh nac jơ nờng bic gơl Gia Lai – Lâm Đồng yal, bi neh măi rơndeh tàm gùng dà lơgar 27 mờr 10 nam do. Lài do, gơl bơh Dăk Lăk lòt Lâm Đồng mìng roh 5 jơ, tŭ do gùng gơbàn ờ diơng pal roh 6 jơ, geh tŭ pal roh tus 7 jơ tơn. Tàm tŭ tơngai tơmut bal càr, khà nac gơguh bơh 30 tus 40%, sồr hìu rơndeh pal tơnguh khà rơndeh lòt jun pơndiang. Mơya gùng lòt ờ diơng, rơndeh lòt ờ ring lơh nac bòl ngan, priă tă pal gơguh rlau 1 dơ̆ mờ nggùl: “Nac đì rơndeh sùm gơtìp bơñul rơndeh, rơndeh lòt kung gơtìp gơ rềng sơl, ƀuơn gơ tơm tềng rồm rơndeh, ngan là bơnah bơkang bồ đap mờ tiang tơr è rơndeh hờ ngkời, kong rơndeh den sùm gơtìp lŭ trơs, sùm gơlik geh bơta bluh, lơhiăp kong rơndeh. Bơdìh hơ̆ tai, lài do gùng niam den ờ huan hoàc zờu, tŭ do gùng ờ niam lơh rơndeh hoàc tai bơh 15 tus 20 lít zờu pah dơ̆ lòt, tài pal lòt rơlĕ, ờ gơtùi lòt ndang, lơh priă tă blơi xăng zờu gơguh mờr 500 rbô đong”.

Ồng Trương Trung Thắng, Phó Kwang lam bồ Sờh Bơt bơtàu càr Lâm Đồng pà git, tŭ do geh mờr 21 kơi sồ Gùng dà lơgar 27 lòt gan kơnhoàl Dam Rông yau, gơ wèt Kơi sồ 85+500 mờ Kơi sồ 106 gơtìp ờ diơng kơn jơ̆ ngan. Jơnau là tài ală nam rềp ndo, mìu dờng gơlik geh jŏ jòng, rơndeh rơndồ pơndiang kơn jơ̆ gơguh uă, lòt rê uă mờ jơh bal broă lơh niam wơl ờ hềt di tŭ.

Ồng Trương Trung Thắng pà git, Sờh neh dan mờ Anih duh broă Làng bol càr Lâm Đồng dan ai lài 10 tơmàn đong nàng lơh niam wơl nisơna ală bơnah broă bè: pès wàs nhơt rŭ rơm kềng gah gùng, lơh niam wơl, tuah wàs rbòng tuh tơlik dà, tơn pồl wơl ală kơrluk dờng. Bè jŏ jòng, neh bơt bơtàu rơndap broă lơh yal Anih duh broă Làng bol càr mờ Ƀộ Bơt bơtàu in ring bal ai 110 tơmàn đong nàng lơh niam wơl jơh gùt 21 kơi sồ gùng ờ diơng, tơngai lam lơh là nam 2026. Ồng Trương Trung Thắng đơs: “Do là gơl gùng kuèl, kơh, sơbơng roh ngan, khà ờ diơng dờng ngan kờñ pal geh bơsong jal mhar mơ tơn. Jat hơ̆, bol hi neh lơh gơs ală broă bơt bơtàu rơndap broă lơh, wac rùp mùl màl lam lơh mờ tŭ do neh yal loh làng tàm pơrlòng giă, rơ wah cau tờm lơh rơndap broă, tŭ neh rơ wah geh cau lơh rơndap broă den hơ̆ sồng lam lơh niam wơl”.

Gùng dà lơgar 27 tŭ do ờ mìng gam tơrbŏ càr Dăk Lăk mờ Lâm Đồng lơm gời, mờ gam tơrbŏ gùng càr 725 lòt gan ală sàh tiah đah mat tơngai mut càr Lâm Đồng dê mờ tiah tờm lơh broă sră pơ àr gơnoar atbồ Dà Làc. Lơh niam gùng dà lơgar do rơp ờ mìng tă bơsong bơta gơlik bè bơtàu tơnguh tàm dơlam is càr, mờ gam dong gàr niam ờdo ờdă làng bol in tai. Tàm sơlơ tơnguh tai tàm tơrbŏ bal ală tiah, geh tai dùl gơl gùng tiah đah mat tơngai lik – tiah đah mat tơngai mut bơtàu tơnguh jơh gùt tiah đah jum tàm gùl lơgar.