Ală ngai Hàm nhai 08 do, Hà Nội bềng lìu tàm rùp să bồng bi pơrhê sơrmañ rơmĭt. Nùs nhơm sơlơ duh hồl rlau tŭ geh lơh ală dơ̆ bơrlŭ bal tàp ling lòt pơdar, làng bol lòt pơdar tàm Ƀlàng dờng Ba Đình kah yau. Tàm ală gơl gùng mpồl ling lòt pơdar làng bol lòt pơdar lòt gan, làng bol neh tơrgùm gal ngan bơh drim. Geh uă ngan cau bơh ală càr ngài tus bơh ngai lài mờ guh bơh gờñ lòt tus gùng jòi anih niam nàng gơtùi sền gŏ geh mpồl ling lòt pơdar lòt gan. Bơyô Mai Hương tus bơh Quảng Ninh, yal: “Sau guh bơh 5 jiơ nggùl drim, bol sau lòt bơh gờñ ngan nàng gơtùi jòi geh ală anih gơ in niam ngan nàng bal mờ ală cau triang sền gùng drà mờ triang sền ală mpồl ling lòt pơdar lòt gan”.

Dơ̆ bơrlŭ bal tàp dơ̆ 2 geh lơh mang ngai 24/08 pa do mờ bơta tus bal bơh rlau 16 rbô 300 nă ling geh griăt bal mờ 43 mpồl lòt, 18 mpồl ntàu; 6 mpồl rơndeh phàu ling klàng bơh Mpồl ling klàng làng bol Việt Nam dê mờ 8 mpồl rơndeh mờng ngui Kwang àng dê. Is ồn mờ bơta tus bal bơh mpồl ling ală lơgar bơyô: Nga, Lào mờ Campuchia dê. Chờ hờp ơm tàm mpồl “Ùr cau ling yal tơnggĭt jơnau” ling lòt pơdar dơ̆ do, Thiếu tá bi Nguyễn Thị Mùi, ling geh griăp broă mờng lơh yal nùs nhơm tơnơ̆ uă nhai bơsram tàp nàng geh jă jơng cơnđoà lòt tàm ƀlàng dờng Ba Đình: “Cơnđoà jơng lòt tàm ƀlàng dờng Ba Đình, oh gŏ gơlơh hừh nùs ngan, bè geh bơtơl tai bơta pràn mờ cơnđoà lòt pràn kơldang, cơnđoà lòt ală cơnđoà jơng lòt niam. Lòt gan mpràp mờ bol oh geh ai măt sền hờ đah ƀlàng dờng, ngan là đah Gơlăng ƀồc Wa Hồ, mờ măt sền mờ nùs nhơm gơlơh chờ hờp, bềng bơta hừh nùs ngan”.

Dơ̆ tơrgùm bal tàp neh gơhòi gơ jà bơta sền gròi is ồn ngan bơh làng bol càr lơgar mờ năc lòt nhơl dê. Tàm ală gùng drà tiah mpồl ling lòt gan, bềng lìu rùp bồng bi pơrhê sơrmañ rơmĭt gơpar lĭp lơ̆p tàm săp driau dờng tàp tê jơh nùs ngan. Tơl cơnđoà jơng lòt pràn kơldang, mpồl cau lòt niam ngan bơh ală mpồl ling klàng, kwang àng mờ mpồl làng bol dê neh lơh kah wơl nùs nhơm hừh nùs jơi bơtiàn dê, lơh kah wơl jơnau kah kir khin cha jak chài ngan bơh dùl dà lơgar khin cha kơ̆ nùs tàm tam lơh, kơ̆ kơljăp tàm bơ̆t bơtàu mờ sền gàr Dà lơgar. Ờ dồ êt nă làng bol bơh ală càr ƀòn dờng ngài ngan, geh tŭ geh bal năc lòt nhơl ală lơgar neh geh măt bơh gờñ nàng gơtùi sền gŏ tŭ jiơ is ồn do.

Dơ̆ bơrlŭ bal tàp lời wơl tàm nùs nhơm làng bol bơta ngoh rơngăc ngan, dòn kơnờm mờ hừh nùs ngan gĭt lơh bè Mpồl ling klàng làng bol, Kwang àng làng bol mờ bơta pràn tam klăc bơh jơi bơtiàn Việt Nam dê.