Mho ngai 24/9, tàm sơnah ƀòn Buôn Ma Thuột, Sờh Lòt nhơl ƀòn dờng Hà Nội pơgồp bal mờ Sờh Niam chài, Tàp pràn să jan mờ Lòt nhơl ală càr Dăk Lăk, Gia Lai, Khánh Hòa, Lâm Đồng mờ Quảng Ngãi bơyai lơh Pơrjum hòi jà, yal tơnggit mờ lơh broă bal bơtàu tơnguh lòt nhơl. Pơrjum nàng kờñ sơlơ tơnguh tai tàm tơrbŏ bal, ngui bơta pràn bơh 6 càr, ƀòn dờng dê, wèt tus bơt bơtàu phan bơna ală càr, ală tiah li la, gơ kờñ ngan, tơrgùm tàm 4 mpồl là niam chài – phan lời wơl; ù tiah – lòt sền, lơh ngan ngồn; phan sa – blơi phan; lòt nhơl pơgồp bal mờ tìp mat tàm bơyai, pơrjum mờ yal tơnggit nàng kờñ lơh gơlik bơta tàm tơrbŏ bal sơrbac mhar, loh làng đah mpồl lơh sa kă bro mờ cau nac.

Sờh Lòt nhơl ƀòn dờng Hà Nội mờ Sờh Niam chài, Tàp pràn să jan mờ Lòt nhơl 5 càr Dăk Lăk, Gia Lai, Khánh Hòa, Lâm Đồng mờ Quảng Ngãi kĭ sră nggal lơh broă bal bơtàu tơnguh lòt nhơl tơngai bơh nam 2026 tus nam 2030. Do là broă lơh kuơmàng ngan, pơgồp bơnah lam lơh ngan ngồn broă rơndap lơh tơrbŏ bal, bơtàu tơnguh lòt nhơl kơ̆ kơnhăp tàm tơngai tus.