Tàm khà ală kơnòm bơsram khoă sơn rờp Hìu bơsram Niam chài Kwang àng làng bol II dê, geh oh Y Gió Mlô, kơnòm bơsram ơdŭ 10, kòn cau M’nông ơm tàm ƀòn Drang Phốk, sàh Buôn Đôn, càr Dăk Lăk. Mè mờ bèp ndrờm sang rài tài kòp jê, 5 nă oh mi pal tàm kơldìng mờ gơp tàm bơta gam uă kal ke, siơ̆u siar. Bi ùr tơnhua là Nguyễn Thị Ngân Mlô pal ơm rlô bơsram bơh gờñ nàng lơh anih kơldìng ală oh in. Bè hơ̆ den tàng, ngai Y Gió dờp sră gơ kờn mut tàm Hìu bơsram Niam chài Kwang àng làng bol II kung là ngai hìu bơnhă geh tai uă bơta gơn kơnờm. Bi Nguyễn Thị Ngân Mlô đơs: “Pah nam bơsram là sră măi, sră cih, àu mpha, hìu bơsram. Tài hìu bơsram tàm do ngài git nđờ jơt kơi sồ, hơ̆ là bơta kal ke dờng ngan rlau jơh hìu bơnhă dê. Añ bơsram tus ơdŭ 9 den ơm rlô bơsram. Tơnơ̆ tŭ dờp sră yal gơ kờn oh añ dê geh mut tàm Hìu bơsram Kwang àng den hơ̆ ờ mìng là bơta kơp kờñ oh añ dê mờ gam là bơta kơp kờñ añ dê tai, là bơta kơp kơnờm hìu bơnhă dê”.

Gơ wèt mờ Y Gió, ală ngai bơh chờm tàm hìu bơsram là dùl bơta tam gơl dờng ngan. Ơm ngài hìu bơnhă, lơh kwèng mờ pơgru, gơp bơyô mờ anih ơm sa bic tơn, oh sơlơ git loh kơnòl he dê gơ wèt mờ ală cau pròc mhàm tờm gam ơm tàm hìu: “Oh sơnđàc ngan bi klau, bi ùr, sơnđàc ngan oh oh dê. Oh rơp lơh ngan bơsram sră nàng lơh anih kơldìng hìu bơnhă in”.

Kung sơn đờm nam bơsram pa tàm Hìu bơsram Niam chài Kwang àng làng bol II, oh Hoàng Ngọc Hoa, kơnòm bơsram ơdŭ 10 ơm tàm sàh Ea Wer, càr Dăk Lăk geh rài kis uă bơta siơ̆u siar. Ồng oh dê neh geh tŭ lòt tam lơh, gơtìp sơnơm khih dioxin lơh aniai. Bèp oh dê gơtìp kuet kơlte, mè chơt tài rềs àr. Bơh tŭ gam dềt, Hoa neh bơsram jài, ròng bèp mờ oh jài. Gơ wèt mờ hìu bơnhă Hoa, broă oh geh bơsram tàm hìu bơsram pa là tŭ niam nàng oh geh tai bơta ƀuơn bơsram sră, pơlam tàp niam rlau. Ờ mìng geh tai bơta ƀuơn nàng bơsram sră, hìu bơsram pa gam lơh gơlik tai bơta gơn kơnờm nàng Hoa lòt jat bơta kơp kờñ bơh dềt he dê. Bơh bơta kơp kờñ gơ gơs cau ling kwang àng, oh sơlơ pơn đơl lơh ngan tŭ geh bơsram tàm hìu bơsram is ồn do: “Bơh tŭ gam dềt oh neh kờñ lơh Kwang àng, ờ git là oh lơh gơtùi halà ờ, mơya tŭ do oh geh mut tàm Hìu bơsram kwang àng, oh gŏ bơta kơp kờñ he dê neh mờr lơh geh, nàng lơh anih kơldìng bèp oh in tài oh kờñ ƀòn tờm sùm geh ring lơngai”.

Bal mờ Y Gió mờ Ngọc Hoa, ală kơnòm bơsram geh rài kis kal ke ndai kung gam gơ gơs là ală kơnòm bơsram sơn rờp bơh Hìu bơsram Niam chài Kwang àng làng bol II. Nam bơsram 2026 - 2027, hìu bơsram sac rơ wah kơnòm bơsram tàm ală càr Dăk Lăk, Gia Lai, Lâm Đồng mờ Quảng Ngãi, geh 34 ơdŭ, rlau 1 rbô nă kơnòm bơsram. Do là hìu bơsram chuyên is ồn ơm sa bic tơn bơh kâp 1 tus kâp pe lời ai ală mpồl kơnòm bơsram geh rài kis krơi is, tàm hơ̆ geh kòn cau ling sồt să, cau chơt màng; kòn hìu bơnhă dờp bơta dong kờl bơh mpồl bơtiàn geh rài kis kal ke; oh kòn làng bol jơi bơtiàn dồ êt nă cau gơ wèt hìu bơnhă rƀah, ndrờm bè cau rƀah mờ kơnòm dềt gơ wèt bơta sền gàr, dong kờl mpồl bơtiàn.

Jơnau kờñ hìu bơsram dê ờ mìng là lam kơnòm bơsram tus ơdŭ bơsram mờ gam gròi sền, bơto bơtê mờ pơlam tàp tơl làm. Hìu bơsram ơm sa bic tơn dong ală kơnòm bơsram ơm sa bic tơrgùm bal, đềt mềr mờ pơgru, geh sền gròi, git bơta kơp kờñ mờ rài kis nàng geh broă lơh bơto bơtê dipal. Ală broă lơh sền git, lòt sền, pơlam tàp bơta chài mờ broă lơh mpồl bal kung rơp geh bơyai lơh, dong kơnòm bơsram rơhời dờng pràn, pin dờn rlau. Đại tá Mai Hữu Vạn - Lam bồ Hìu bơsram Niam chài Kwang àng làng bol II pà git, hìu bơsram git nền bơt bơtàu hìu bơsram niam chài kòn bơnus, lơngăp lơngai, duh rơngòt bơta pal jat là kơnòl broă kuơmàng: “Hìu bơsram Niam chài Kwang àng làng bol II pơn đơl lơh ngan gơ gơs là hìu gơboh gơbài - tiah mờ ală oh geh sền gròi, geh bơto bơtê, geh pơlam tàp mờ sơlơ pin dờn nàng sơrlèt gan bơta kal ke”.

Ală ngai sơn rờp mut bơsram, ală oh kung gam uă bơta ờ kwèng. Mơya tơnơ̆ tơl nă kơnòm bơsram là dùl rài kis, dùl jơnau yal mờ dùl bơta kơp kờñ krơi is. Gơ wèt mờ ală oh neh geh tŭ ơm tềng đap jơnau pơhìn pal rlô bơsram tài rƀah, kal ke, roh rui halà bơta yah ngài ù tiah, hìu bơsram pa gam pờ gơs dùl gùng pa.

Bơh ală hìu bơnhă gam uă siơŭ siar tus anih bơsram sră, ơm sa bic kơ̆ kơljap, bơta mờ ală oh dờp geh ờ mìng là ală bơta bơsram sră niam rlau mờ gam là bơta pin dờn nàng pơn jat tai cơnđuà hờ bồ đap. Dùl hìu bơsram pa neh rò ală kơnòm bơsram sơn rờp mờ bal mờ ală ngai sơn rờp lơh kwèng mờ pơgru, gơp bơyô là ală bơta kơp kờñ gam geh ròng siam. Gơ wèt mờ Y Gió, hơ̆ là bơta kơp kờñ gơs anih kơldìng hìu bơnhă in. Gơ wèt mờ Ngọc Hoa, hơ̆ là bơta kơp kờñ gơ gơs cau ling Kwang àng. Gam uă hìu bơnhă, bơta kơp kờñ dềt rơhền là oh kòn geh bơsram sră, dờng pràn mờ geh dùl rơnàng tơnơ̆ do niam rlau.