Lơh jat jơnau lơh nền tàm pơrjum bơh Quôk hội dê, tus tŭ do, gùt lơgar neh tă bơsong mờ geh gùng dà tă bơsong ai 5 rbô 200 rơndap broă lơh, ù tiah in mờ 70 rbô lồ neh geh ngui. Tàm pơrjum, Thủ tướng ồng Phạm Minh Chính đơs là, tŭ do gùt lơgar gam mờr 3 rbô rơndap broă lơh geh kal ke, gơ kòl. Ală ƀộ, gah broă lơh dà lơgar, càr, ƀòn dờng jal mhar dan gùng dà, broă lơh tă bơsong, yal loh làng bè gơnăp gơnoar bơsong. Gơ rềng tus broă lam lơh broă lơh jơnau kờñ dà lơgar, Thủ tướng sồr Ƀộ Broă lơh sa suơn sre mờ Tiah ơm kis jal mhar bơt bơtàu jơnau yal kơlôi sơnơng gơtùi lam lơh jat ngan ngồn, yal Jơnau lơh nền bơcri priă Broă lơh jơnau kờñ dà lơgar tơngai bơh nam 2026 tus nam 2030, tàm nhai 01 nam 2026, bơh bơta tam pà kâp, jàu gơnoar uă ngan rlau jơh ai ală ƀòn lơgar in. Tơrgùm bơt bơtàu broă lơh, broă rơndap lơh lam lơh geh tơngume tờm, geh bơta tờm, di mờ bơta geh ngan bơh tơl tiah, tơl ƀòn lơgar dê; pleh rah rài, ờ ngan ngồn, ai lài tiah uă kal ke in; tơrgùm bơt bơtàu ală broă lơh kơnhăp kơ̆, gơguh lơh sa tơlir mờ tàm tơrbŏ bal ală mpồl lơh gơlik phan; tơrgùm tam gơl bồ tơngoh kơlôi sơnơng, tơnguh jơnau git wă, pơn jờng, hòi jà nàng làng bol pin dờn lik klàs rƀah, tàm pơrlòng lơh pas.