Dơ̆ mìu dà tih dà cò lồi nhai 11 nam 2025 tàm càr Khánh Hoà neh lơh hoàc huơr rơlao 6 rơbô tơmàn đong, lơh 22 nă cau gơtìp chơ̆t, 20 nă cau sồt să mờ git nđờ rơhiang rơbô hìu làng bol gơtìp aniai. Ồng Nguyễn Hồng Trường, Kwang Lam bồ Anih yal lài nhơm trồ tiah – Dà ia càr Khánh Hoà pà git, bơta gơlik geh rề sàr bơh trồ tiah ngai sơlơ ni sơna ngan. Tàm dà dờng Cái Nha Trang, bŭ lah ờ hềt sơrlèt mờ bơta tih dà bơh lài tus tŭ do tàm tiah đah tô dê, mơya tàm tiah đah jum den dờp geh khà dà tih uă ngan. Geh bơta do là tài mìu sơr pơgồp bal mờ broă lơh ƀòn ơm kis lơh gơsrềp ñhòng hòr, lơh gơmù bơta pràn tơlik dà.

Ù tiah dà dờng ờ jòng, kơh, tiah ring ờ ơnàng kung neh lơh gơtìp tih dà mhar, soăt mhar mơya rềs àr sơlơ uă. “Bol añ gam treh tềl dà tih tàm tơl ală tiah tàm tiah gơtìp gơbam dà jrô. Kung bè tềng hìu añ là dùl tềl tơngŏ dà tih mờ anih lơh broă geh mờr 20 hìu kwang bàng, viên cứk gơtìp geh hìu gơbam dà bơh 1 tus mờr 2 thơ̆k, hơ̆ là ală tềl dà tih. Tàm tơngu me hơ̆, mpồl lơh broă lơh geh sră rùp gơbam dà, lơh cơng tàng nàng yal Anih duh broă Làng bol càr in lơh broă rơndăp lơh, tơnguh uă cồng nha broă rơcang pleh mờ rềs àr bơh trồ tiah tàm tơngai tus”.

Bơh tàm mùl màl lơh broă rơcang kơrian mờ dơ̆ mìu dà tih dà cò lồi nam lài, Thiếu tướng Nguyễn Túy, Kwang Đơng lam Gah Đơng lam Ling klàng càr Khánh Hoà ai tơngŏ ală bơta ờ pràn pal geh bơsong: broă git ală bơta tàm ù tiah ờ hềt geh di pal, broă pơgồp bal đah ală mpồl lơh broă gam ờ nền nòn, gùng dà broă lơh “4 tơn tàm tiah” ờ hềt di tŭ, mờ jơnau yal drơng tàm broă sồr lơh geh tŭ gơtìp koh gơl. Thiếu tướng Nguyễn Túy sồr pal lơh mơ sră rùp gơbam dà nàng gơtùi rơcang lài sền wơl ƀòn ơm kis, ntrờn làng bol lik bơdìh tiah ngòt rơngơ̆t; rơcang lài phan lòt rê, phan bơna; tơnguh broă tàp nàng git mờ tơnguh uă bơta pràn pơgồp bal đah ală mpồl. “Mpồl Đơng lam Rơcang lài broă lơh làng bol càr sồr ală tiah, mpồl lơh broă pơn jăt tai sền, sền wơl tiah ƀòn ơm kis, hìu lơh broă anih lơh broă, pôs ling; lơh ngan ntrờn làng bol, phan bơna lik bơdìh tiah ngòt rơngơ̆t. Mờ dan Anih duh broă Làng bol càr bơ̆t bơtàu ală rơndăp broă bơtàu tơnguh lơh sa mpồl bơtiàn geh gơtùi ngui bàr bơta, gơdờp mờ ù tiah tàm ƀòn lơgar, tŭ lơi kung rơcang lài drơng tàm broă rơcang pleh mờ rềs àr bơh trồ tiah bal mờ jòi dong klàs cau gơtìp rềs àr”.

Ồng Trần Phong, Củ tịc Anih duh broă Làng bol càr Khánh Hoà đơs là, pal sền broă rơcang kơrian mờ rềs àr bơh trồ tiah jăt broă tìp bal geh rơcang lài, jŏ jòng. Bal mờ broă sền wơl ală tiah di gơlan gơtìp uă, gơnoar atbồ ală tiah pal lơh gơs rơndăp broă rơcang pleh lài mờ rềs àr bơh trồ tiah, tơnguh uă bơta pràn đơng lam, lam lơh mờ lơh pràn broă ngui bơta chài măi mok tàm broă sền gròi, yal lài rềs àr bơh trồ tiah. “Pal mhar sền wơl, lơh ndrờm bal, lơh gơs Broă rơndăp lơh nàng rơcang kơrian rềs àr bơh trồ tiah tơngai bơh nam 2026 tus 2023, tơrgùm tơl ală gùng dà broă lơh nàng rơcang kơrian lài jăt tơl kâp rề sàr, di pal mờ bơta geh bơh tơl tiah, tơl bă ù dê. Mờ tơnguh uă bơta niam broă sồr lơh, lam lơh; lơh pràn broă tam gơl sồ, ngui bơta chài măi mok tàm broă sền gròi, yal lài mờ sồr lơh tus tàm ală ƀòn”.

Mùl màl tàm càr Khánh Hoà pà gŏ, tàm bơta tam gơl nhơm trồ tiah, rềs àr bơh trồ tiah ờ gam jăt mờ bơta gơlik geh bè lài do dê tai. Tŭ ală tềl tơngŏ lơngăp lơngai sùm gơtìp uă rơlao, den jơnau yal tơngit bơh broă sền gròi, bơta pràn yal lài mờ broă rơcang lài nàng kơrian mờ là bơta tờm ai geh. Ală jơnau bơsram bơh mìu dà tih dà cò, di lah geh ai jơnau bơsram nền nòn, rơ̆p là tơngu me tờm nàng ală tiah in rơcang lài rơlao lài mờ tŭ gơtìp rềs àr, gơmù rềs àr mờ gàr niam lơngăp lơngai ai làng bol in.