Tàm Hà Nội, uă ngan làng bol càr lơgar mờ năc lòt nhơl ală lơgar lòt tàm anih tờm ƀòn dờng, gùt dar hìu Yàng bàp Lớn,  tơnau dà  Hoàn Kiếm... wă rò ngai Kơnràñ lik lềng. Trồ tiah mang kah Ngai Kơnràñ lik lềng ờ geh mìu, ờ mrềt ir, lơh geh ală bơta ƀuơn ngan ai ală broă lơh nhơl chờ, tus sền bơh làng bol dê.

Ờ mìng ală gơl gùng drà tờm gùt dar tơnau dà Hoàn Kiếm lơm, tiah hìu Yàng bàp Lớn kung gơ hòi gơ jà gal ngan năc lòt nhơl geh mat bơh gờñ nàng tus sền, cùp rùp lời kir sơnrai. Kềng gah hìu Yàng bàp, ù tiah geh bơka niam àng gơ crà mờ ală ƀong đèng mờ ală phan bơka kah Ngai Kơnràñ lik lềng dê, pơyoa jơnau kờñ bè dùl mang Noel lơngai lơngò, lơngăp lơngai, gơ hòi gơ jà uă ngan làng bol mờ năc lòt nhơl tus sền mờ sền gĭt.

Nùs nhơm Ngai Noel tàm càr Dăk Lăk bềng lìu làm gùt ală tiah, gơ klŏ gơ crà tàm bơta trồ mrềt bơh tiah Tây Nguyên dê. Ală sơnĕ gùng rê hờ ală ƀòn jat yàng bàp, hìu jum bơka gơ klŏ gơ crà ngan. Bơdìh mờ hìu jum Cíñ toà, ală hìu tac dà kơphe, hìu tac phan bơka gơ klŏ gơ crà ngan, sền niam ngan… neh lơh gơlik ală gah cùp rùp krơi is ngan.

Dùl kàl Noel chờ hờp, ram mhŭ, làng bol jat yàng bal mờ gơp wèt hờ tơngai tơnơ̆ do bơh ƀòn lơgar dê ngai sơlơ bơtàu tơnguh. Làng bol sền gŏ nùs nhơm Noel tàm Hìu jum Cíñ toà Buôn Ma Thuột ram mhŭ mờ bềng lìu nùs nhơm tam pà bal.

Mang ngai 24/12, Dà Làc bè soh tàm să he dê dùl nơm ào pa bềng bơta àng gơcrà. Tàm sơntŭ tŭ gŏ tŭ ờ, đèng sòl gơ crà niam ngan bơh ală hìu Yàng bàp mờ ală jơnau đơs chờ jờng rơ kah ngai Kơnràñ lik lềng hô hơng gùt ală gùng drà, yal tơngĭt dùl kàl Noel lơngai lơngò tàm tiah rơbô bơkào dê. Bơta tờm àng gơcrà ngan rlau jơh là tiah Hìu Yàng bàp Chính toà Dà Làc.

Tàm ù tiah yô yau, tờm nho Noel dờng jòng jơnhoa ngan bal mờ gĭt nđờ rơbô đèng led àng gơ crà, gơ hòi gơ jà gĭt nđờ rơbô dơ̆ làng bol mờ năc lòt nhơl. Mờ 21 Hìu Yàng bàp tàm sơnah ƀòn anih tờm Xuân Hương Dà Làc kung àng gơ crà tàm mang Noel sơl, gơ gơs tiah tus niam chài ờ gơtùi ờ tus ờ, bulah làng bol, năc lòt nhơl dòn Yàng halà ờ dòn Yàng. Tàm ală ƀòn lơgar, kòn cau K’Ho kung hô hơng wă rò Ngai Kơnràñ lik lềng, hòi dan ai nam pa lơngai lơngò, hờm ram.