Tơnơ̆ mờ tŭ Jơnau lơh nền tàm pơrjum sồ 36 geh ai ngui, tàm Mpồl lơh broă bal suơn sre Xanh Krông Păc, nùs nhơm chờ hờp sền gŏ ngan tàm muh măt ală cau tàm mpồl. Uă nam do, mpồl lơh broă bal mờ 7 nă cau mùl màl, rơlao 200 hìu lơh broă bal mờ rơlao 120 lồ ù tam tờm sầu riêng neh lơh broă sùm jăt khà VietGAP, ngui phan cih jơnau yal tàm điện tử, bơ̆t bơtàu broă atbồ tiah tam di pal. Mơya, bŭ lah rơlao 70% khà bă ù neh geh khà VietGAP, mpồl lơh broă bal kung gam ờ hềt geh ai màh sồ tiah tam tài uă bă ù lơh sa tam bơrlŭ bal phan tam, ờ hềt di pal mờ jơnau pal jăt bè tiah tam mìng geh tam dùl bơta phan di jăt mờ lài do dê.

Ồng Trần Văn Thắng, Kwang Lam bồ Mpồl lơh broă bal pà git, Jơnau lơh nền sồ 36 pờ geh dơ̆ niam nàng ală tiah lơh sa mùl màl, lơh jăt bal broă lơh mơya neh geh tŭ gơtìp gơkòl bè sră nggal geh tus mhar mờ drà kă bro lơgar bơdìh dê. “Bol añ đơs niam ngan broă Chính phủ ngui mhar ngan, pràn ngan nàng lơh niam wơl ală bơta gơkòl tàm Jơnau lơh nền sồ 38 dê. Bơta do rơ̆p bơsong kal ke ai làng bol lơh broă sa mờ mpồl lơh broă bal in. Ală phan neh lơh di mờ broă lơh tŭ do geh dơ̆ niam nàng tăc mờ lơgar bơdìh, bơta pràn tàm pơrlòng sầu riêng Việt Nam dê rơ̆p geh gơguh. Añ pin dờn là làng bol rơ̆p git wă rơlao tàm broă geh sùm bơta niam, bơh tŭ hơ̆ sầu riêng Việt Nam gơtùi tàm pơrlòng mờ brồ guh tàm drà kă bro ală lơgar dê”.

Mpồl bơtiàn mpồl lơh sa kă bro tăc mờ lơgar bơdìh kung đơs niam Jơnau lơh nền sồ 36 sơl, neh bơsong di “gơkòl” dờng ngan là sră nggal ai màh sồ tiah tam mờ hìu dăp in. Ồng Huỳnh Kiều, ala măt mpồl lơh sa kă bro tăc plai sầu riêng mờ lơgar bơdìh tàm càr Dăk lăk pà git, sră nggal dan ai màh sồ bơh mpồl lơh sa kă bro dê neh kơ̆p rơlao 4 nhai do. Broă lơh ndrờm geh lơh tàm internet lơm, tam pà kấp tus tàm sàh mờ tơrmù tơngai bơsong rơ̆p ai geh tam gơl dờng ngan ai broă tăc mờ lơgar bơdìh in. Ồng Huỳnh Kiều kung dan mờ ală gah lơh broă geh gơnoar pơn jăt tai ai geh jơnau bơto sồr mùl màl ală jơnau pal jăt nàng mpồl lơh sa kă bro buơn lơh. “Dan Sờh Lơh sa mờ măi mok Kă bro phan lơh mùl màl jơh ală jơnau pal jăt gơs jơnau bơto sồr ƀuơn lơh, ƀuơn jăt nàng mpồl lơh sa kă bro ƀuơn tàm broă ngui, gàr niam di jăt jơnau pal jăt mờ tơrmù tơngai bơsong. Mờ, gah dia pal geh jơnau bơto sồr nền nòn, loh làng nàng mpồl lơh sa, cau lòt blơi mờ làng bol tiah tam lơh di mờ jơnau geh ai, tơrmù ală rềs àr bè dia tàm broă blơi, tăc mờ lơgar bơdìh plai sầu riêng dê”.

Jơnau lơh nền tàm pơrjum sồ 36 ờ mìng geh kơ̆p gơn bơsong sră nggal kấp màh sồ tiah tam mờ gam là bơta tờm bơsong ală kal ke gam gơtìp tàm mpồl tăc plai sầu riêng mờ lơgar bơdìh dê. Gùt càr tŭ do geh di pơgăp 200 hìu dăp mơya mìng geh đ pơgăp 16 hìu geh ai màh sồ dan cih măt pal geh bơh Anih lơh broă atbồ phan kă bro bal mờ rơndeh lòt gan mpồng nhàr lơgar mờ tă dia bal mờ kơrian broă kă bro blơ̆ blăc lơgar Lo ai ală mpồl lơh sa kă bro lơgar bơdìh in lơh sa, lơh gơs phan ha là prăp gàr phan sa mờ phan geh lơh bơh broă lơh sa kă bro nàng geh ai tăc mờ gùng tờm tus drà kă bro lơgar Lo (màh GACC) dê; khà tiah tam geh ai màh sồ kung gam ờ uă. Bơta do neh lơh uă mpồl lơh sa kă bro pal tăc mờ lơgar bơdìh bơh mpồl lơh broă ndai, gơlik geh bơta blơi tăc màh sồ mờ uă rềs àr bè sră tăc, sră nggal… Mò Hoàng Thị Thanh Thủy, Kwang Lam bồ Công ty Pơlam Dia tàm càr Dăk Lăk pà git: “Jơnau lơh nền sồ 36 pa ai ngui añ mùl màl chờ hờp ngan. Kơrnoăt boh lam neh geh bơsong dùl bơnah, sră nggal ai màh mhar mờ ndrờm bal rơ̆p tơrmù bơta ờ tơl màh tiah tam, ờ tơl hìu dăp, lơh geh tiah tàm pơrlòng ndrờm bal rơlao. Bol añ rơ̆p dong kờl ală mpồl lơh sa kă bro mờ làng bol lơh broă sa suơn sre lơh gơs sră nggal nàng gờñ geh màh sồ tiah tam”.

Ồng Lê Anh Trung, Chủ tịch Mpồl Sầu riêng càr Dăk Lăk geh jơnau pơgồp bal, bơta mpồl lơh sa kă bro kơ̆p gơn ờ mìng là sră nggal geh tơrmù tơngai mờ gam là gùng dà broă lơh atbồ pa. Broă tam gơl kơrnoăt kờp yal is, dờp kơnòl is pơgồp bal mờ sền tơnơ̆ rơ̆p tơrmù bơta kal ke sră nggal, mờ tơnguh uă kơnòl bơh ală cau tờm dê tàm gùt mpồl lơh sa. “Añ kơ̆p gơn ală gơkòl bè sră nggal tăc mờ lơgar bơdìh rơ̆p ờ gam lơh kal ke tai. Tŭ ală bơta geh lơh niam, di mờ jơnau geh ai den kung rơ̆p tơrmù bơta ờ niam, gơkòl tàm broă bơsong sră nggal. Bơta kwơ màng rơlao, do rơ̆p là tơngu me tờm nàng càr Dăk Lăk bơ̆t bơtàu tiah tam kloh, niam, tơl pràn nàng di pal mờ jơnau kờñ bơh ală drà kă bro tàm ală lơgar dê”.

Jơnau lơh nền tàm pơrjum sồ 36 bơh Chính phủ tơlik jơnau broă ai mờ atbồ màh sồ tiah tam, hìu dăp geh lơh tàm Anih yal tơngit broă lơh drơng ala dà lơgar dê; gơnoar dờp, bơsong sră nggal geh tam pà kấp ai Anih duh broă Làng bol kấp sàh in. Tơngai bơsong geh tơrmù gam ờ uă ngan 3 ngai lơh broă gơwèt mờ sră nggal ờ di ai màh sồ tăc mờ lơgar bơdìh.

Gơwèt mờ càr Dăk Lăk, do là càr geh bă ù tam tờm sầu riêng uă ngan gùt lơgar dê, Jơnau lơh nền tàm pơrjum sồ 36 geh kơ̆p gơn ờ mìng bơsong gơkòl bè sră nggal mờ gam pơgồp bal tàm broă lơh loh làng mpồl geh kwơ dê, tơnguh uă bơta phan phan geh lơh mờ bơta pràn tàm pơrlòng bơh gah phan sầu riêng tàm drà kă bro ală lơgar dê.