Bi Y Sim Kbuôr ơm tàm xã Hoà Xuân, ƀòn dờng Buôn Ma Thuột là cau lơh broă tàm Kông ty Bơcri priă bal Lòs Asean tàm Tiah lơh sa mờ măy mŏk Hoà Phú bơh nam 2020. Tàm tiah lơh broă geh ci ƀộ đảng, bi neh lơh ngan pơnđơl sùm ờ gŏ ơm rlô nàng geh ntàu mŭt tàm mpồl đảng bơh Đảng dê mờ ngan ngồn geh gơgơs đảng viên tàm nhai 09 nam 2024. Bi Y Sim Kbuôr đơs, do là bơta pơnrơ dờng, bơta chờ hờp bơh ờ gŏ di mìng is nă să tờm añ dê lơm mờ gam gơ wèt mờ hìu bơnhă añ dê tai. Bi Y Sim Kbuôr, đơs: “Añ lơh tàm kông ty bơcri priă bal làng bol dê lơh is mờ geh tơmŭt Đảng den hìu bơnhă cau lơi kung gơlơh nrơ̆t ndơl lơm, chờ hờp mờ pơñiờ să ngan. Là đảng viên den he pal lơh niam kơnòl broă, lơh krơh”.

Lơh cau lơh phan bal tàm Kông ty Bơcri priă bal Lòs Asean, đảng viên Y Hoan Ktul gam geh pin dờn pồ lơh kwang bàng tàm Ci ƀộ Kông ty tơngai lơh broă bơh nam 2020- 2025. Lơh krơh tàm tơl broă, Y Hoan geh ci ƀộ jàu broă dong kờl tề lam dồ nă làng bol jak niam ngan nàng tơmŭt Đảng tàm tơngai tus. Y Hoan đơs: “Añ sùm bơto tơngkah oh mi tàm mpồl, is ồn là ală oh mì cau Rơđê, pal lơh ngan bơsram tàp, tus bal lơh ală broă lơh bơh kông ty dê, lơh jăt niam kơnòl broă geh jàu, lơh gơlik tơl lòs drơng ală sră dan blơi phan in. Dilah pơnđơl niam mờ geh bơta kơ̆p kờñ, oh mi rơ̆p geh tơmŭt tàm Đảng”.

Ci ƀộ Đảng Kông ty Bơcri priă bal Lòs Asean geh lơh bơh nam 2017, bơh chờm geh 5 nă đảng viên, tus tŭ do neh bơtàu tơngguh tus 25 nă. Ồng Trần Trung Tiến, Ƀí thư Ci ƀộ pà gĭt, geh bơta sền gròi bơh kwang đơng lam bồ kông ty dê, broă lơh bơtàu tơngguh Đảng tìp uă bơta ƀươn. Ală nam rềp ndo, nam lơi ci ƀộ kung tơmŭt pa lơm bơh 3 tus 4 nă đảng viên, sơrlèt broă jàu. Ồng Trần Trung Tiến yal, ci ƀộ gam pơnđơl bơtàu tơngguh gơgơs Đảng ƀộ tàm nam 2026: “Tàm nam 2025, ci ƀộ pơnđơl tơmŭt bơh 3 tus 5 nă đảng viên, jăt broă jàu bơh Đảng ủy Gah ală anih lơh broă mờ Mpồl lơh sa kă bro càr Dăk Lăk dê jàu. Bol hi neh rơcăng mpồl làng bol jak niam ngan pơlam cih sră yal bè rài kis, lùp sền nền wơl sră nggal mờ gam kơ̆p ring bal nàng lơh tơmŭt đảng tàm qúy I nam 2025  là 2 nă oh mi”.

Ồng Trần Quang Tân, Phó Ƀí thư Đảng ủy Gah ală anih lơh broă mờ mpồl lơh sa kă bro càr Dăk Lăk pà gĭt, jơh gùt càr tŭ do geh 11 mpồl đảng kâp hơđơm tàm ală mpồl lơh sa kă bro ờ gơ wèt dà lơgar dê ătbồ mờ 537 nă đảng viên. Tơngai do, broă lơh bơtàu tơngguh Đảng tàm ală mpồl lơh sa kă bro is làng bol dê geh ală cồng nha niam ngan, pơgồp bơnah dong ală mpồl lơh sa kă bro lơh broă kơ̆ kơl jăp, dong Đảng rềp rlau mờ ală mpồl cau, ală bơnah lơh sa. Ồng Trần Quang Tân, yal: "Pah nam, bol hi pơnđơl tơmŭt bơh 16 nă đảng viên rlau hơđang tàm gah mpồl lơh sa kă bro ờ gơ wèt dà lơgar dê ătbồ, tàm hơ̆ geh bơh 1 tus 2 nă đảng viên là cau ătbồ mpồl lơh sa kă bro. Tus nam 2030, bol hi rơ̆p bơ̆t bơtàu tai bơh 2 tus 3 mpồl Đảng kâp hơđơm mờ bơh 1 tus 2 mpồl cau bè mpồl ơruh pơnu, mpồl cau ling yau. Ết ngan là bơh 8% mpồl lơh sa kă bro is làng bol dê tàm càr rơ̆p geh mpồl Đảng, mờ geh đảng viên kwang đơng lam bồ mpồl lơh sa kă bro mŭt bal tàm kâp ủy”.

Broă lơh bơtàu tơngguh Đảng tàm gah mpồl lơh sa kă bro is làng bol dê tàm càr Dăk Lăk geh ală cồng nha niam ngan, neh pơgồp bơnah lơh geh tiah lơh broă kơ̆ kơl jăp, geh cồng nha, tă pơgồp tàm bơta bơtàu tơngguh cíñ trị, lơh sa mờ mpồl bơtiàn càr Dăk Lăk dê ngai sơlơ bơtàu tơngguh rlau tai.