Thủ tướng Cíñ phủ cih dờp, jờng rơ uă ngan mờ jờng rơ ală ƀộ, anih lơh broă, ală tiah, mpồl lơh broă geh gơnoar neh lam lơh niam ngan ală kơnòl broă lài mờ tŭ mờ tàm dơ̆ ơm rlô Sa tềp bơhiàn dà lơgar.

Thủ tướng Cíñ phủ sồr ală ƀộ, anih lơh broă, ală tiah, mpồl cau, cau dồ nă să geh gơrềng tơnơ̆ dơ̆ ơm rlô sa tềp bơhiàn dà lơgar pal mhar ngan, tơrgùm bơsong wơl broă lơh mờ nùs nhơm “lơh broă gờñ, mut lơh broă mơ” jat di jơnau đơng lam bơh Mpồl đơng lam Đảng dê; bơsram lơh jat gùng dà broă lơh “bơta pràn sơnđờm bơh bồ tơngoh kơlôi sơnơng, bơta sền sơnơng; bơta gơn kơnờm sơnđờm bơh bơta tam gơl pa, bơceh lơh; bơta pràn sơnđờm bơh Làng bol, mpồl lơh sa kă bro”, “tềm pềr tŭ tơngai, sền dờng màng bồ tơngoh jak”; kràñ cê jơh nùs, rcang lài, bơceh lơh rlau tai tàm broă lơh đơng lam, sồr lơh, đơng lam, lơh geh bơta tam gơl pràn bơtàu tơnguh mờ nùs nhơm “neh pơnđơl pràn lơh ngan rao den pal lơh ngan rlau tai, neh jơh nùs lơh ngan rao den pal jơh nùs lơh ngan uă rlau tai, neh lơh broă kràñ cê jơh nùs rao den pal lơh broă kràñ cê jơh nùs rlau tai”; sơlơ tơnguh tai pràn kơl dang lơh sa kă bro, lơh geh broă lơh, broă lơh ai làng bol in, gàr tơl niam rài kis mpồl bơtiàn tơl làm, pa ngan, tơrgùm bal, kơnhăp kơ̆; pơnđơl pràn lơh ngan gơguh GDP nam 2026 lơh geh bơh 10% rlau đang pơgồp bal mờ gàr kơ̆ kơl jap lơh sa dờng, sŏk sền roh giă priă, gàr niam ală tàm pơn ring dờng bơh rài lơh sa dê.