Broă tơriang tơriồng, nền nòn mờ geh kơnòl bơh cau lơh broă pơs gùng neh pơgồp bal tàm broă lơh tơlir, kloh, niam mờ bơ̆t bơtàu ƀòn dờng Dà Làc gơs ƀòn dờng lòt nhơl pơnrơ ngan, ƀòn dờng Festival bơkào lơgar Việt Nam, ƀòn dờng bơceh lơh UNESCO tàm gah gùng đơs crih, ƀòn dờng ngăc ngar wèt tus tiah drà tềl kah yau dunia dê.

Ưn ngài broă pơgồp bal niam do, 181 nă cau lơh broă geh ƀòn dờng Dà Làc jờng rơ. Tàm dơ̆ jờng rơ, ồng Nguyễn Thái Học, Atbồ ing Ƀí thư Tỉñ ủy càr Lâm Đồng tơlik nùs nhơm dờp broă lơh geh mờ jờng rơ ală broă pơgồp bal bơh ală cau lơh broă pơs gùng tàm broă gàr ƀòn dờng Dà Làc sùm kloh, niam, ai geh bơta niam bơnĕ ngan tàm nùs nhơm cau năc dê, tàm hơ̆ uă ngan là tàm nhai geh bơyai lơh Festival bơkào Dà Làc dơ̆ 10 nam 2024. Mờ hòi jà làng bol pal tam pà bal, tus bal sền gàr tiah kis mờ ală broă lơh mùl màl.