Drim ngai 7/10, Mpồl Sồr lơh lòt jòi, rồ tơrgùm mờ đal gĭt mat ƀồc ntìng cau ling chơ̆t màng càr Quảng Ngãi bơyai lơh jun pơndiang, tàm jàu rlau 2 rơbô 200 mẫu sinh phẩm ƀồc ntìng cau ling chơ̆t màng dơ̆ 4 ai Viện Pháp y Ling klàng in nàng sền gĭt ADN, drơng broă đal mat cau ling chơ̆t màng. Lài mờ dơ̆ tàm jàu, ală cau ala mat pơdơng bơkào, chu ñàng, lời 1 phuk kun bồ, tơngŏ nùs nhơm gĭt ưn ngài ală cau neh chơ̆t phi să tài lơngăp lơngai is, khat gơboh is bơh Dà lơgar tờm dê. Ală mẫu geh sền gròi, tàm pơndrờm sră nggal, lĭp wơl mờ prap gàr jat di broă lơh.

Tàm rlau 2 nhai do, ală mpồl ai mẫu càr Quảng Ngãi neh tờ rlau 13 rơbô 500 bơtô ƀồc tàm gĭt nđờ rơhiang ƀlàng tơ̆p ƀồc cau ling chơ̆t màng, ai rlau 9 rơbô mẫu tơl ală bơta nàng xét nghiệm. Tus tŭ do, càr neh tàm jàu rlau 6 rơbô 800 mẫu ai Viện Pháp y Ling klàng in nàng mblàng ADN, pơgồp bơnah đal gĭt mat ală cau ling chơ̆t màng gam ờ tơl jơnau yal.