Tơnơ̆ 30 nam kờp bơh tŭ lơh bè ờs wơl bơta git gơp mờ 25 nam lơh jat Jơnau kĭ hơ BTA, kă bro phan đah 2 lơgar neh gơguh pràn ngan jơh bal bè bơta ndrờm pal mờ bơta niam, gơ gơs dùl bơta gơn kơnờm kuơmàng ngan chồl tơnguh gơguh lơh sa, ai geh broă lơh mờ tơnguh tai bơta tơrbŏ bal ală mpồl tac phan đah 2 rài lơh sa geh bơta tàm dong kờl uă. Tŭ do, Mỹ ơm dơ̆ 1 tàm khà ală lơgar bơcri priă tàm lơgar Việt Nam mờ 1 rbô 500 rơndap broă lơh mờ kờp jơh priă bơcri cih tàm sră rlau 12 tơmàn dolar Mỹ. Sơ lơŭ wơl, Việt Nam geh 266 rơndap broă lơh bơcri priă tàm lơgar Mỹ mờ kờp jơh priă bơcri cih tàm sră mờr 1 tơmàn 400 tơlak dolar Mỹ. Bè kă bro phan nam 2025, kờp jơh priă lơh geh rlau 140 tơmàn dolar Mỹ, gơguh mờr 300 dơ̆ pơndrờm mờ 30 nam lài.

Tàm anih cribơyai, ală cau ala mat neh cribơyai jrô bè lơh sa kă bro phan đah Việt Nam mờ Mỹ, tơrgùm bè broă lơh dia tac blơi phan mờ lơgar ndai mờ broă lơh rơcang gàr kă bro phan, pơgồp bơnah lơh niam rlau tai jơnau git wă bal, chồl tơnguh lơh broă bal ngan ngồn đah ală gah geh gơ rềng; bơh hơ̆ rề ơnàng bơta ƀuơn lơh broă bal mờ lơh kơ̆ bơnàng jă ai bơta git gơp lơh sa kă bro phan đah Việt Nam mờ Mỹ bơtàu tơnguh kơnhăp sùm, kơ̆ kơljap jŏ jòng mờ geh kuơ bal tàm tŭ tơngai pơn jat tai.