Pah ngai, tŭ mat tơngai ờ hềt mpờl, mơya sap sèng ling bơh mpồl Kảñ sát dà lềng Việt Nam dê neh ring ngan, song ngan. Tơl mat sền nền cê, tơl cơnđuà jơng kơ̆ kơljap bơh cau ling dê bè jơm jơh bơta duh rơ ồl bơh kàl prang duh tiah đah tô dà lơgar dê. Trồ tơngai duh rlau 40 đồ C halà ală dơ̆ mìu sơr jŏ jòng git nđờ jơ, mơya ală cau ling kung gam kơ̆ dơn, àng drim tàp – trồ mho tàp, geh uă ngai pal tàp bal mờ trồ mang tơn.

Thượng úy Nguyễn Hữu Duy Thái pà git: Nàng gơtùi geh mpồl sap sèng ring mờ niam, tơl nă cau tàm mpồl pal pơnđơl jơh pràn. Tơl cơn đuà jơng, tơl broă lơh, muh mat ndrờm bal ndrờm bal, chài rơgơi. Bulah bòl glar, mơya cau lơi kung lơh ngan ai tơnggŏ di nùs nhơm bơh cau ling Kảñ sát dà lềng Việt Nam dê: “Geh soh tàm să phan cau ling Kảñ sát dà lềng dê den să tờm añ bal mờ jơh ală cau bơsram tàm mpồl pơn yờ să ngan tŭ rơp geh cơnđuà lòt tàm ƀlàng dờng Ba Đình kah yau. Tŭ tơngai pơlam tàp tàm trồ tiah duh rơ ồl, mơya bol hi kung gam pơnđơl pràn uă ngan rlau jơh nàng lơh gơs jak kơnòl broă”.

Ơm tàm gùl sèng mpồl ling, Trung uý Trần Đức Nhân ngoh rơngac: Do là bơta pơn yờ să dờng ngan gơ wèt mờ să tờm bi. Geh mat tàm mpồl ai ling lòt tàm pơ dar bơh ngai chờ dờng dê. Nhân sền hơ̆ là bơta pơn yờ, kung là kơnòl sơl. Nùs nhơm tam klac bal mờ bồ tơngoh pơnđơl pràn sùm dong ală kwang bàng, cau ling sơrlèt gan bơta bòl glar, kal ke: “Pal bơsong niam nùs tồr să tờm dê nàng sơrlèt gan. Să tờm pal lơh ngan uă mờ pal geh bồ tơngoh pơnđơl pràn dờng ngan rlau jơh. Bơta pơn yờ să là să tờm he neh tă pơgồp dùl bơnah dềt tàm kơnòl broă dờng dà lơgar dê”.

Ai Thượng uý Nguyễn Phúc Đệ, tơnơ̆ tŭ jùt gơ jă gơ jal ntờc dà mìu gam gơ kờn tềng muh mat gơtìp tơngai sa pà git, ală mpồl neh lơh gơs tŭ tơngai pơlam tàp bơh sơn rờp, tŭ do gam mut tàm dơ̆ pơlam tàp jrô rlau, tàp bal mờ ală gah ndai. Geh bòl glar, mơya lài ngan là bơta pơn yờ să tŭ soh tàm să phan cau ling Kảñ sát dà lềng, geh tă pơgồp dùl bơnah dềt rơhền tàm ngai chờ dờng jơi bơtiàn dê: “Să tờm añ gŏ bơtuah ngan mờ chờ hờp ngan tŭ geh pơgồp bơnah tàm cồng nha ngai chờ dờng dê. Añ mờ ală cau ling tàm gah do pơnđơl uă ngan nàng lơh gơs jak kơnòl broă”.

Tơnơ̆ dơ̆ tơrgùm pơlam tàp, Trung tướng Lê Quang Đạo – Đơng lam Kảñ sát dà lềng mờ Trung tướng Bùi Quốc Oai – Cíñ ủy Kảñ sát dà lềng neh mù tơn tàm ƀlàng tàp, tus tơl gah nàng lùp còp, pơn dờm pơnđiang. Ală dơ̆ kup tê kơ̆, ală jơnau nting tơngkah bềng bơta pin dờn, bal mờ ală phan pà dềt neh tơnguh tai bơta pràn nùs nhơm ai kwang bàng, cau ling in. Ala mat Kwang lam bồ Gah đơng lam Kảñ sát dà lềng Việt Nam, Trung tướng Bùi Quốc Oai tơngkah: “Ală oh mi sền gàr tĕ pràn kơldang să jan, gàr sùm bơta pràn pơlam tàp, cèng tàm să bơta pơn yờ să. Tàm ngai chờ dờng, tơl cơnđùa jơng ală oh mi dê rơp ờ mìng ai tơnggŏ bơta pràn, di mờ jơnau sồr pal jat mờ gam là rùp să bơh bơta dờng pràn, bơtàu tơnguh bơh mpồl Kảñ sát dà lềng Việt Nam dê”.

Đòm jat nùs nhơm Kac màng nhai 8 mờ Sơntờm dà lơgar (02/9) gam sùm, mờ bơhiàn lơh ngan tam lơh pơnđơl lơh geh pha lin bơh Ling klàng làng bol Việt Nam dê, bơta lơh ngan tam klac bal, pơnđơl pràn ờ git ơm rlô bơh kwang bàng, cau ling dê, Dơ̆ ai ling lòt tàm pơ dar tàm Ƀlàng dờng Ba Đình ngai 02/9 tus do, ală cơnđuà jơng pràn kơldang, ring drĭ tơn bơh ală cau ling Kảñ sát dà lềng dê ngan rơp là rùp hin niam, lời wơl tềl niam ngan tàm nùs làng bol gùt lơgar mờ gơp bơyô ală lơgar.