Tàm Nha Trang, uă hìu năc ơm bơh 3 tus 5 sơrmañ geh khà cau dan ơm mờr 70%; geh ờ uă hìu năc ơm tàm tiah ƀuơn niam geh rơlao 90%. Ală tiah ơm tàm Phan Rang, Ninh Chử, Vĩnh Hy kung geh khà gơguh uă.

Càr Khánh Hoà tŭ do geh rơlao 1 rơbô 400 hìu năc ơm mờ di pơgăp 70 rơbô jơdŭ ơm, di pal mờ jơnau kờñ ơm di tàm dơ̆ ơm rơlô do. Mơya, khà dan jơdŭ ơm pơn jăt tai gơguh, tơrgùm tàm tiah tàm gùl mờ jăt gah dà lềng. Ồng Trần Tấn Ngọc, Atbồ dờng dùl hìu năc ơm tàm gùng Trần Phú, sơnah ƀòn Nha Trang pà git, bơta pràn jơdŭ ơm di tàm ngai ơm rơlô geh di pơgăp bơh 80 tus 90%. Jăt ồng đơs, bŭ lah priă jơdŭ ơm tàm càr Khánh Hoà ờ hềt tơnguh uă, cau năc kung gam rơcang lài dan jơdŭ ơm nàng pleh mờ gơtìp ờ geh jơdŭ ơm tàm ală ngai gal cau dan ơm.