Jăt Anih duh broă Làng bol càr Khánh Hoà yal, tơngume kờp sền nền wơl tơrgùm tàm ală mpồl broă jàu tờm ngan, geh: khà kờp làng bol; khà lơh tiah drà; bồ tơngoh jak bơtàu tơngguh lơh sa – mpồl bơtiàn; rơndăp tăp sèng phan bơna bơ̆t bơtàu tiah drà mờ phan bơna bơ̆t bơtàu mpồl bơtiàn; pràn jak ătbồ, đơng lam tiah drà; sền gàr tiah ơm kis, gơdờp mờ tam gơl nhơm trồ tiah mờ sền gàr niam dà lơgar – lơngăp lơngai. Jăt tàm bơta hơ̆, ală sờh, gah, ƀòn lơgar pal gĭt nền loh ală broă jàu neh lơh geh, ờ hềt lơh geh, jơnau bơh tài gơbàn mờ broă lơh bơsong jăt tŭ tơngai loh làng. Bal bal mờ lơh sir ală broă jàu tiah drà, càr Khánh Hoà gĭt nền tơngai bơh nam 2026- 2030 là tŭ tơngai tơngguh pràn bơtàu tơngguh lơh sa, lơh ngan geh khà gơguh lơh sa bàr nơm khà, gơ jăt bal mờ tam gơl broă lơh tơrlòng lài gơguh lơh sa tàm uă broă ngan ngồn.

Nàng lơh geh jơnau kờñ tus nam 2027 Khánh Hoà gơgơs ƀòn dờng gơ wèt khà Dà lơgar, càr neh sền gròi gơhòi gơ jà bơcri priă geh săc rwah tàm lơh sa mờ măy mŏk măy mŏk pa, lơh sa mờ măy mŏk tơlir, logistics, lơh sa dà lềng, tiah drà ngăc ngar mờ lòt nhơl niam uă.