Jat jơnau yal tàm dar pơrjum, tàm 02 nhai bồ sơnam, lơh sa dờng sền bal kơ̆ kơl jap, roh giă priă geh gròi sền, gơguh lơh sa geh sơlơ tơnguh, ală tàm pơnring dờng bơh rài lơh sa dê geh gàr niam. Sơñio sồ giă ngui sa gơguh mờr 3% pơndrờm dùl tŭ bal mờ nam lài. Lùp priă dia dà lơgar lơh geh rlau 600 rơbô tơmàn đong, gơguh 13% pơndrờm dùl tŭ bal mờ nam lài. Kờp jơh priă lơh geh bơh tăc phan mờ lơgar ndai lơh geh 155 tơmàn dolar Mỹ, gơguh rlau 20% pơndrờm dùl tŭ bal mờ nam lài.

Đơs pơndŭt pơrjum, Thủ tướng ồng Phạm Minh Chính đơs sùm ală bơta niam ngan bơh ală bơta lơh sa mpồl bơtiàn dê. Thủ tướng đơs là, pal kràñ cê jơh nùs, rcang lài, bơceh lơh, lơh jat geh cồng nha Jơnau lơh nền tàm pơrjum bơh Pơrjum dờng dơ̆ XIV đảng dê mờ ală Jơnau lơh nền tàm pơrjum mìng dùl tơngume bơh Ƀộ Cíñ trị dê. Thủ tướng sồr rcang lài niam ngan drơng broă dơ̆ tĕ khà Cau ala mat Quôk hội, Mpồl duh broă Làng bol ală kấp, Pơrjum Dà lơgar 2, Pơrjum dơ̆ 1 bơh Quôk hội khoă XVI dê. Thủ tướng sồr ală Ƀộ, gah broă, ală tiah kờñ pal kah ală bơta gơrềng ờ niam tus lơgar he dê, is ồn là tam lơh gam kal ke ngan tàm Trung Đông mờ ală tiah ndai tàm dunia. Kơ̆ nùs jơnau kờñ gàr kơ̆ kơl jap lơh sa dờng, sŏk sền roh giă priă mờ sơlơ tơnguh tai gơguh lơh sa 10%.