Thủ tướng ồng Phạm Minh Chính đơs niam ală ƀộ, gah lơh broă, anih lơh broă gơrềng bal neh di tŭ lơh jăt ală jơnau sồr bơh Thủ tướng Cíñ phủ bal mờ bơyai lơh jăt broă gàr tơl khà geh ai, niam kơl jăp priă tăc xăng jờu tàm bơta tam lơh tàm Trung Đông gam gơtìp kal ke.

Đơs nền ờ lời ờ tơl xăng jờu tàm ală bơta lơi, Thủ tướng sồr đơng lam priă tăc xăng jờu di jăt drà kă bro mờ Dà lơgar tam pà; lơh jăt ală gùng dà broă lơh ring kơl jăp priă tăc ndrờm bal, di pal, geh cồng nha; gàr niam mờ ndrờm bal bơta kwơ đah Dà lơgar, Làng bol mờ mpồl lơh sa kă bro; kơrian ờ ai broă prăp phan, tơnguh priă tăc mờ sơgràm broă dong kờl nàng lơh geh kwơ is, lơh ờ niam drà kă bro. Thủ tướng sồr ală ƀộ, gah lơh broă, anih lơh broă gơrềng bal, tàm hơ̆ geh Ƀộ Kwang àng tus lùp sền, sền gròi mờ lơh glài ală tìs di lah geh.

Thủ tướng kung sồr sền swì nền wơl mờ tơrmù ală bơta dia, priă pal tă, priă pal tong gơrềng tus xăng jờu nàng dong kờl mpồl lơh sa kă bro mờ làng bol tàm bơta tŭ do, yal lài mò7 ngai 20 nhai 3. Tàm bơta di lah kờñ, di lah tam lơh tàm Trung Đông jŏ jòng, pal sền wơl, tơrgùm yal mờ kấp geh gơnoar in sền ai kes priă nàng dong kờl ring kơl jăp priă tăc xăng jờu.