Lài mờ tŭ ơhò lơh ka cèng kơ ƀàng sồ BĐ 97083TS lik bơh anih ơhò ơm Tam Quan (sơnah ƀòn Hoài Nhơn, càr Gia Lai) nàng lòt tàm dà lềng kŭp ka, cau tờm ơhò ồng Nguyễn Hứa bal mờ ală cau tàm mpồl lơh ka ờ ru ngan rcang tơl làm sră dan, sră sền sơ wì, sră ai gơnoar kŭp ka, mat cau tàm mpồl mờ măi mok jat sền gùng lòt. Ờ mìng rcang nền nòn lài mờ tŭ lik bơh anih ơhò ơm lơm, mờ tàm jơh gùt gùng lòt tàm dà lềng, ồng rơ̆p cih tơl làm tàm sră broă kŭp ka, kŭp ka tàm tiah geh ai gơnoar kŭp, ờ gŏ di mut tàm tiah dà lềng kơryan ờ ai kŭp ka ờ.

Ồng Hứa pà gĭt, bơh tŭ phan tàm dà lơgar Việt Nam gơtìp Anih duh broă câu Âu (EC) lơh glài sră rơmĭt, cau lơh ka kong uă hoàc huơr tài bơh giă tăc ờ uă pơndrờm mờ lài do. Tơnơ̆ tŭ geh mblàng yal mờ gĭt wă là, broă lơh jat jơnau sồr kơryan kŭp phan tàm dà lềng IUU pơgồp bal mờ gơnoar kwơ geh ngan bơh he dê, ồng bal mờ ală cau tờm ơhò ndai lòt kŭp ka tiah ngài neh kĭ hơ pơr gon mờ lơh jat niam:“Ơhò añ lơh broă tàm tiah Trường Sa, kŭp ka sọk dưa, ka ngừ ƀò. Lòt den pal tơl làm sră pơ àr, cih tàm sră broă kŭp ka tơl làm. Làng bol lơh ka bol añ lơh jat, kơ̆p kờñ lơh bè lơi gờñ geh tă sră rơmĭt nàng ală phan tàm dà kơ̆ kơl jăp jŏ jòng rlau tai. Añ kung mblàng yal mờ ală cau tờm ơhò ndai là oh mi pal tam klăc ờ gŏ di lơh tìs tàm tiah dà lềng lơgar ndai, dong kờl bal mờ gơ̆p ală broă lơh tàm dà lềng”.

Anih ơhò ka dà lềng Tam Quan, sơnah ƀòn Hoài Nhơn, là dùl tàm ală anih ơhò lơh ka dờng ngan rlau jơh càr Gia Lai dê, mờ gĭt nđờ rơbô nơm ơhò kŭp ka tàm dà lềng sùm lik mut. Ồng Đặng Văn Dẫn- Phó Kwang lam bồ drơng Mpồl Atbồ anih ơhò ka dà lềng pà gĭt, tŭ do, mpồl lơh broă gam ngui broă lơh atbồ ơhò ka kràñ ngan. Jơh ală sră pơ àr mut, lik tàm anih ơhò ka dà lềng geh lơh bơh tàm phần mềm atbồ; ơhò mìng geh gơnoar ơm mờ lik bơh anih ơhò ơm dà lềng dê tŭ geh măi mok jat sền gùng lòt (VMS) geh pờ sùm. Lài mờ tŭ mut tàm anih ơhò ơm dà lềng, cau tờm ơhò pal yal lài 1 jiơ, nàng kwang bàng lòt sền ală jơnau jat sền gùng lòt. Tơnơ̆ tŭ geh sền gĭt tơl làm, ơhò hơ̆ sồng geh gơnoar mut tàm anih ơhò ơm dà lềng, nàng kờp sền khà phan tơnhào mờ cih mơ tơn tàm măi mok, bơh hơ̆ lơh song dơ pă ngan ngồn tiah tờm kŭp phan tam dà.

Ồng Dẫn pà gĭt, tàm tơngai tus, anih ơhò ơm rơ̆p pơn jat tai lơh kràñ atbồ, kràñ cê jơh nùs ờ dờp ka bơh ơhò lơi ờ bài lơh jat, mơkung bơcri priă lơh kơnhăp wơl phan bơna bơt bơtàu anih ơhò ka ơm dà lềng nàng kờñ lơh geh niam rlau tai jơnau sồr kơryan kŭp phan tàm dà lềng IUU:“Bol añ pơgồp bal niam mờ ală anih lơh broă lơh jat Adat boh lam bè pôs đồng ling sền gàr tiah nhàr lơgar, Ci kụk Phan tàm dà  mờ gơnoar atbồ ƀòn lơgar, bal mờ jat sền tàm ală măi jat sền gùng lòt (VMS). Dilah gĭt gŏ ơhò mut jrô ir tàm tiah nhàr, den bol añ pơgồp bal mờ sồr ơhò rê wơl. Tàm anih ơhò ơm Tam Quan, pah nhai bol añ ndrờm pờ dơ̆ mblàng yal nàng ală cau măi ơhò mờ cau tàm ơhò tus bal, tơnguh tai bơta gĭt wă bè kơryan kŭp phan tàm dà lềng IUU”.

Tŭ do, càr Gia Lai là dùl tàm ală tiah geh mpồl ơhò dờng ngan rlau jơh gùt lơgar, mờ mờr 6 rơbô nơm ơhò dà lềng, khà lơh geh phan tàm dà pah nam rlau 270 rơbô tấn. Tàm khà hơ̆, geh 3 rơbô 200 nơm ơhò lơh broă sùm tàm dà lềng. Ồng Nguyễn Công Bình – Phó Ci kụk Phan tam dà càr Gia Lai pà gĭt, nàng lơh jat ală jơnau sồr bè kơryan kŭp phan tàm dà lềng IUU, càr neh lơh sir broă cih mat, sền sơ wì, pà gơnoar tơnhào phan mpồl ơhò mờ sền gĭt jơh ală jơnau tơmŭt tàm ală jơnau Dà lơgar dê.

Ală măi jat sền gùng lòt (VMS) geh mpồl lơh broă geh gơnoar jat sền jơh bal ngai mang, di tŭ sền gĭt ơhò lòt ngài ir mờ tiah nhàr halà roh bơta tàm yal tơngĭt, kràñ cê jơh nùs bơsong kràñ ală cau lơh tìs:“Bol añ tơrgùm kờp sền, gĭt tiah ală ơhò kŭp ka, ală tiah, ƀòn lơgar geh ơhò lơh tìs, tàm pà kwang bàng, đảng viên jat sền ală ơhò lơh tìs nàng di tŭ gĭt gŏ mờ kơryan ală ơhò geh tềl tơngŏ lơh tìs. Bol añ tă pơgồp jơnau đơs mờ càr, dong kờl rcang phan bơna măi mok jat sền gùng lòt ai ală ơhò lòt rlau 15 thơk. Pah nhai, bol añ ai ală mpồl lơh broă lòt tàm càr tiah đah Jum dà lơgar, pơndờm pơnđiang ală cau tờm ơhò mờ làng bol lơh ka kĭ pơrgon ờ lơh tìs. Bơh nhai 5 nam 2024 tus tŭ do, ờ geh ơhò ka lơi tai lơh tìs tiah dà lềng lơgar ndai gơtìp kŭp tai”.

Làng bol lơh ka mờ ală anih lơh broă atbồ càr Gia Lai, gam lơh jat kràñ ală jơnau sồr kơryan kŭp phan tàm dà lềng IUU. Lơh ngan do ờ mìng ngan ngồn pơgồp bơnah tă “sră rơmĭt” phan tàm dà bơh EC dê gơwèt mờ Việt Nam lơm, mờ gam lơh geh bơnàng jă ai dùl broă kŭp ka bơtàu tơnguh kơ̆ kơl jăp jŏ jòng, gàr niam broă lơh sa jŏ jòng ai làng bol lơh ka in.